Aningaasanut inatsit Inatsisartuni pisortatigoortumik akuerineqartoq

Aappaagumut aningaasanut inatsisissaq Inatsisartuni pisortatigoortumik akuerineqarpoq.

Partiit sisamat sisamanngormat inatsisissaq sisamanngormalli isumaqatigiissutigereerpaat. Aningaasanut inatsisissaq Inatsisartuni ullumi oqaluuserineqartussani kisimiittoq Inatsisartunit akuerineqarpoq.

Aningaasanut inatsisissaq aningaasanut naalakkersuisumit Inatsisartunut saqqummiunneqartussaagaluarpoq.

Asii Chemnitz Narupili Inatsisartuni ataatsimiinnerup ullaaq aallartinnginnerani tunuarluni nalunaaruteqarpoq. Nakkutilliisut isornartorsiuinerat pissutigalugu tunuarluni taassuma tusagassiuutinut nalunaarummi allappaa.

Asii Chemnitz Narupimi ineqarnermut tunngatillugu aqutsineq Nakkutilliisunit isornartorsiorneqartoq Kommuneqarfik Sermersuup atuutsilermagu borgmesteriuvoq.

AAMMA ATUARUK Asii Chemnitz Narup aningaasaqarnermut naalakkersuisutut tunuarpoq

Taamaammat aningaasanut inatsit Múte B. Egedemit (IA) saqqummiunneqarpoq.

Partiit sisamat nuannaartut aappaagumut aningaasanut inatsisissaq sisamanngormat saqqummiuppaat. Inuit Ataqatigiit, Naleraq, Atassut Demokraatillu aningaasanut inatsisissamik isumaqatigiissuteqartuupput.

Partiit sisamat akornanni aningaasanut inatsisip isumaqatigiissutigineqarnerani Qaqortumi mittarfissamut aningaasassarsinissaq, sinerissap qanittuani qaleralinnut akitsuutit peerneqarnissaat, soraarnerussutisiaqarnermut aningaasaliinerunissaq Namminersorlutik Oqartussallu inissiiaataanut akitsuinissap atorunnaarsinneqarnissaa ilaatigut ilaapput.

Siumut partiini kisiartaalluni aningaasanut inatsimmik isumaqatigiinniarnermut ilaanngilaq. Partiip Parsimi isumaqatigiissutip ilaanera akerleralugu ilaanngilaq.

Siumulli aningaasanut inatsit marlunngornermi ualikkut taasissutigineqarmat  ilaa akerlerigalugu aningaasanut inatsimmik akuerseqataaginnarpoq.

Taamaalilluni aningaasanut inatsit partiinit tamanit akuerineqarluni.