Aningaasanut Inatsit: Akileraarutip qaffanneratigut Nunatta karsia isertitaqassaaq
Aningaasanut Inatsisip 2015-imoortup Inatsisartuni ualeq manna aappassaanneerlugu oqaluuserineqarnerani, nuna tamakkerlugu akileraarutip ataatsimik qaffanneqarnissaa oqallisaaneruvoq.
Siunnersuulli tamanna Siumumit siunnersuutaasoq, Inatsisartuni illuatungiliuttunit isornartorsiorneqangaatsiarpoq.
Akileraarutip qaffanneratigut, umiatsiaararsorlutik aalisartut eqqorneqarnerisa saniatigut Nunatsinni akissaatikinnerit eqqorneqartussaassasut Inuit Ataqatigiit sinnerlugit Inatsisartuni ilaasortap, Aqqaluaq B. Egedep oqaaseqarnermini eqqaavaa.
- Tassami innuttaasut taakkuupput aningaasanik pisariaqartitsinerpaanut ilaasut taamaattumillu taakku artukkerneqartariaqanngitsut, Aqqaluaq B. Egede oqarpoq.
Akileraarutip proccentimik ataatsimik qaffanneqarnissaannik Siumup siunnersuutaa, Naalakkersuisoqataasut Atassutip aningaasaqarnermut oqaaseqartartuanit, Steen Lyngemit tupaallaatigineqarpoq.
Taassumali oqaluttarfimmit oqaatigaa, siunnersuut Atassummit tapersersorneqartoq, erseqqissarluguli qaffaanermi kikkut tamarmik eqqorneqartussaammata annikinnerpaamik qaffaasoqarnissaa eqqarsaatigineqartariaqassasoq.
Nuna tamakkerlugu akileraarutip procentimik ataatsimik qaffanneqarnissaa partiinit illuatungiliuttunit ernumanartinneqartoq pillugu, Aningaasaqarnermut Naalakkersuisup, Andreas Uldumip taakku eqqissisarpai oqarluni maanna oqallinneq aatsaat aappassaaneerinninnerummat siunnersuullu suli aalajangiiffigineqavinngimmat tamanna ernumanartutut tiguneqassanngitsoq.
Naqqiut.
Qulaani nutaarsiassami KNR-imit ippassaq allapugut, nuna tamakkerlugu akileraarut Naalakkersuisunit siunnersuutigineqartoq. Tamanna eqqunngilaq. Inatsisartuni ippassaq oqallinnermi Siumut sinnerlugu saqqummiisup, Jens Immanuelsenip saqqummiinermini oqaatigaa, aningaasanut inatsisip pingajussaaneerneqannginnerani nalilersugassatut akileraarutip procentimik ataatsimik qaffanneqarnissaa Siumumit siunnersuutaasoq.
Kukkusumik allassimanerput utoqqatsissutigaarput.
