Aningaasanut inatsit aappassaaneerneqalerpoq
Inatsisartut 2006-mut aningaasanut inatsisissaattut siunnersuutaat appassaaneerlugu ullumi nalunaaqutaq ataatsinut inatsisartut oqaluuserissavaat.
Aningaasanut inatsisissatut siunnersuut tallimanngormat aappassaaneerlugu oqallisigineqartussaagaluarpoq, naalakkersuisunulli ilaasortap Doris Jakobsen-ip Siumumeersup Alaskamut Issittumi Nunallit Unammiuaarnerannut peqataanera peqqutigalugu inatsisartut oqallinnissaagaluat ullumimut kinguartinneqarpoq.
Aningaasanut inatsisissap siullermeerneqarnerani allannguutaasunut pingaarnerpaavoq amigartoorutissat annikillinerat. Siullermeernerani amigartoorneq 72 millioni koruuninik annertutigigaluartoq aappassaaneernerani 52 millioni koruuninik annikinnerulersimavoq.
Allannguinermut peqqutaavoq naalakkersuisut Paamiuni innaallagissiorfissamik nutaamik sanatitsinissaagaluat kinguartinneqarmat, misissorneqaqqaarusummat erngup nukinganik innaallagissiorfiliortoqarsinnaanera.
Taamaammallu amigartoorutissaagaluit 20 millioni koruuninik annertutigisut aappaagumut nuutinneqartut, Sermitsiaq tallimanngormat saqqummersoq allaaserisaqarpoq.
