Aningaasanut inatsit aappaagumoortoq akuersissutigineqarpoq
Aalisakkat assigiinngitsut pisarineqartartut akitsuusernerisigut, katillugit 110 million koruuninik aningaasartaqartup, aningaasanut inatsit appaagumut atuuttussaq 20 million koruuninik sinneqartooruteqartussanngortippaa.
Aalisakkat pisarineqartartut akitsuuserneqartut ilagaat qalerallit, raajanut akitsuut qaffanneqarpoq aamma avaleraasartuunik misiliilluni aalisartut pisaat akitsuuserneqarlutik.
Aningaaseriviup Grønlands Bankenip piginneqataassutaasa pingajorarterutaasa tuniniarneqarnerisiguttaaq, aningaasanut inatsit iluatsinneqarpoq.
Ilaqutariit ukiumut isertitakitsut meerartaat ukiumut aningaasanik tusind-erpaalussuarnik pisartagaqalersinneqartut, illutaarnissamik siunertaqarlutik aningaaserivitsigut attartortut aamma ikiorserneqarput, tassa taakku attartornerminni akileraarutitigut akikilliliiffigineqarmata.
Aningaasanut inatsisip allatut aaqqissuunneqarnerani sanaartorneq sipaarfigineqassaaq, naak tamanna piffissaq kingullerpaaq atorlugu aningaasanik amerlagisassaanngitsunik illuartitsiffiugaluartoq.
Aningaasanut inatsisip allannguutissaanik isumaqatigiinniarnerit eqqarsaatigalugit, Aningaasaqarnermut Akileraartarnermullu ataatsimiititaliaq Naalakkersuisullu nukittuneqqusaannerat ersersinneqarpoq, tassa Naalakkersuisut partiit tunuliaqqutitik ingammik Siumukkut oqaloqatigilluarnissaannik pingaartitsisimanngimmata.
Aningaasanut inatsissap Inatsisartuni oqaluuserineqarnera aallartippoq ippassaq tallimanngornermi ualikkut nalunaaqutaq ataatsimut. Ataatsimiinneq aallartiinnartoq Demokraatit piumasarigaluarpaat, aningaasanut inatsisissaq kingusinnerusukkut oqaluuserineqartariaqartoq, oqarlutik allannguutissat taama amerlatigisut imaaliallaannaq naammassineqarnavianngitsut. Siunnersuulli tamanna itigartitsissutigineqarpoq.
Aningaasanut inatsisip pingajussaanik oqaluuserineqarluni taasissutigitinneqarlunilu naammassineqarnissa ippassaq unnuap qeqqanut killeqarpoq. Allannguutissatut siunnersuutit katillugit 30-it taasissutigineqartareersullu, aningaasanut inatsit atuuttussanngortinneqarpoq ippassaq unnukkut nalunaaqutaq aqqanermut.
