Aningaasanut inatsit 2006-imoortoq kiisami atuutilersinneqarpoq
2006-mut aningaasanut inatsit kinguarsarneqangaatsiareerluni qaammatit 15-it qaangiutiinnartullu ullumi pingajussaaneerneqarnermini akuersissutigineqarluni naammassineqarpoq.
Inatsisip naammassineqarnissaa qilalukkat naartusarneratut sivisutigisutigigaluartoq, inatsisaagallartunik atuutsitsisoqarnera pissutigalugu, inuiaqatigiinnut ajortumik sunniuteqanngilaq.
-Qujanartumik periarfissaqarpoq utaqqiisaagallartumik inatsisiliornissamut. Aningaasaqarnermut inatsisissat utaqqiisaagallartut marluk suliarineqartariaqarsimapput. Siullermik qinersinissamik oqartoqarmat aningaasanut inatsisaagallartoq siulleq akuersissutigitigineqarpoq, inuiaqatigiit unittuuinnginnissaat piniarlugu. Soorlu sanaartornerit, soraarnerusutisiallit, utoqqalinersiallit, ilinniartuunersiutillit, sulisunullu aningaasanut akilersuutissat, kommuninullu pisussaaffiit naammassineqarnissaat taamaalillugit qulakkeerneqarsinnaasimapput.
Taamaallaat suliap kimeeruttoornissaa kisimi annilaanganarsimasinnaagaluarpoq. Inuiaqatigiinnulli ajortumik kinguneqanngilaq, aningaasaqarnermut naalakkersuisoq Josef Motzfeldt ataatsimeereernerup kingorna nuannaaqisoq oqilisimarpaseqisorlu oqarpoq.
Inatsisartuni ippassaq ataatsimiittoqarnerani naalakkersuisunut ilaasortap Asii Chemnitz Narup-ip naalakkersuisuni issiaannarnissaa nalornissutaaleraluarpoq. Josef Motzfeldt-illi pisup nalaani ernumassuteqarsimanngilaq:
-Taamatut iliuuseqartoqartillugu inatsisartunut ilaasortat ataasiakkaat qanoq taasinissaat isumaqatigiinniarnerit pitinnagit nalorninartorujussuusarpoq. Partiit assigiinngitsuuvugut, taamaammallu nuannaarutigisariaqarpoq, isumaqatigiinniarusunneq, ajornartorsiutinillu siullernik naapitsinermi tunniutiinnannginnissaq, tamannalu naalakkersuisooqatigiit pingaartikkaat malunnarpoq, Josef Motzfeldt oqarpoq.
Aningaasanut inatsit 51,2 millioni koruuninik amigartooruteqarpoq, Demokraatillu inatsit tamakkerlugu akuersissutigisinnaanngikkaluarlugu inatsimmut akuersillutik taaseqataapput.
