Aningaasanut inatsisissatut siunnersuut ullumikkut saqqummiunneqassaaq

Aningaasaqarnermut inatsisissatut siunnersuut Naalakkersuisoqatigiit pingajussaaneerlutik saqqummiutissavaat, Maliina Abelsen-imulli taanna siullersaavoq.

Naluneqanngitsutut Palle Christiansen, aningaasanut inatsisissatut siunnersuummik ukioq kingulleq saqqummiussissuuvoq, ukioq mannali amma oqariartuut taannaavoq.

Isumaqatigiinniartoqarnissaa siunniunneqarpoq, ataaserli naaperiutigineqarsinnaanngilaq  - tassalu aningaasanut inatsisip oqimaaqatigiittariaqarnera. Allatut oqaatigalugu isertitat sipporlugit aningaasanik atuinerusoqassanngilaq.

Aningaasanut inatsisissaq kingusinnerpaamik ulloq novembarip 15-iat tikitsinnagu   akuersissutigineqareersimassaaq. Tamannali sioqqullugu inatsisartut katersuunnissaanni septembarip 16-iani aallartittussami Inatsisartuni pingasoriarluni oqallisigineqaqqaassaaq,

Tamatummunnga ilanngullugu ataatsimiititaliat arlaqartut angalanerisa, taamaattumillu inatsisartunut ilaasortat peqataasinnaannginnerisa nalaanni, aningaasanut inatsisissap saqqummiunneqarnera, Aleqa Hammond-imit isornartorsiorneqarpoq.

Soorunalimi saqqummiussinermut najuutissaagut, qulequttallu saqqummiunneqartut pillugit ullup qeqqanut radioaviisimi tusagaqarumaarpusi.