Aningaasanut Inatsisissatut siunnersuut saqqummiunneqarpoq
Innaallagissap, kiassarnerup erngullu akiisa assigiikkunnaarnerat isorliunerusunut annertuumik malunniutissanngilaq. Taama Naalakkersuisut Aningaasanut Inatsisissatut siunnersuumminnik ullumi saqqummiussaqartut siunnersuuteqarput.
Innaallagissap kiassarnerup erngullu akii assigiinngikkunnnaarnerisa kingorna nunarsuarmi uuliap akia qaffakkiartuinnarsinnarpoq. Uuliap akitsoraluttuinnarnerata kingunerisaanik isorliunerusuni akit qaffangaatsiarnissaat pinngitsoorniarlugu, akinut nalimmassaasoqarnissaanik Naalakkersuisut ukioq manna Aningaasanut Inatsisissamut siunnersuuteqarput. Akinut nalimmassaasoqanngippat isorliunerusuni najugaqartut kilowattimemut 3 krone 9 øremik akiliisalertussanngormata.
Akit assigiikkunnaarsinneqarnerata kingorna isorliunerusormiut annertuallaamik akiliisannginniassammata kilowatsimemut akip 0,25 øremik appartinneqarnissaa aningaaliiffiginiarneqarpoq, taamaalilluni atuisut eqqorneqartussaagaluit kilowattimemut 2,84 øremik akiliisalissallutik.
Akinut nalimmassaatissat Nuummi innaallagiartorlutik kiassartunit akilersinneqarniartut, Aningaasaqarnermut Naalakkersuisoq Josef Motzfeldt, ukioq manna Aningaasanut Inatsisissatut Naalakkersuisut siunnersuutaannik ullumi saqqummiussinermini taama oqarpoq.
Aningaasanut Inatsisissaq akuersaarneqarpat ukioq manna aappaagulu amigartooruteqarluni ingerlatsisoqassagaluartoq, taamaalillunilu toqqortaanik atuisoqassagaluartoq, 2008 2009-lu sinneqartooruteqarluni ingerlatsiviussasut erseqqissaatigineqarpoq.
Ilinniartitaanermik annertuumik siuarsaanissaaq, Paamiuni mittarfiliortoqarnera, tamatuma saniatigut erninermut atatillugu sulinngiffeqartarnermik sivitsuineq kiisalu meeqqanut ileqqaagaqartitsinissaq ukioq manna aappaagulu aningaasartuuteqangaatsiarnissamut tunngaviutinneqarput.
Aningaasanut Inatsissatut siunnersuummi aningaasat katillugit 5,5 milliarder koruunit aningaasartuutissanut sinaakkutissatut siunnersuutaapput. Aningaasartuutaanerusussat ilaatigut sinersortaateqarallarmat tapiissutigineqartarsimasunik matussuserniarneqarput.
