Aningaasanut inatsisissatut siunnersuut akuerineqassanersoq nalunarpoq

Inatsisissatut siunnersuut aappassaaneerneqassaaq, Inatsisartullu Aningaasaqarnermut ataatsimiititaliaata inatsisissatut siunnersuut nutaaq taama isikkoqartillugu suli akuersaanngimmassuk, Aningaasaqarnermut naalakkersuisoq Per Berthelsen sukataartariaqassaaq.

Siunnersuummi pingaarnertut inissisimasut arlaqartut suli qulakkeerneqanngillat.

Nukissiorfiit ingerlatseqatigiiffinngortinneqassanersoq ingerlatseqatigiiffinngortinneqassannginnersorluunniit assersuutitut taaneqarsinnaavoq.

Aappaagumiit atuutilersussamik ukiumut 145 millionit koruuninik sipaaruteqartoqartarnissaa Aningaasaqarnermut naalakkersuisup Per Berthelsenip naalakkersuisut sinnerlugit siunnersuutigaa.

Sipaarutiginiarneqartut agguataarneqarput, sanaartornermut 70 millionit koruunit Namminersornerullutillu Oqartussat ingerlanneqarnerannut 75 millionit koruunit ukiumut sipaarutiginiarneqassammata.

Sipaarutaasussatut siunnersuutigineqartut piviusunngortinneqarsinnaanngippata susassaqarfinni allani sipaarniuteqartoqartariaqarnissaa, Aningaasaqarnermut naalakkersuisup oqaatigereerpaa.

- Sipaarniutiginiarneqartut piviusunngortinneqarsinnaassanngippata innuttaasut eqqorneqarnerlussinnaapput, Per Berthelsen oqarpoq, nangipporlu:

- Aningaasanut inatsisissatut siunnersuummik amigartoorutilerujussuarmik nassatalimmik akuerinnittuaannartoqassappat, Landskarsi imaarukkiartuinnassaaq, taamaalisoqarpallu suliassanik tulleriiaarinissamut periarfissat minnerulissapput, Aningaasaqarnermut naalakkersuisoq oqarpoq.