Aningaasanut inatsisissaq suli nalornisitsivoq
Aningaasaqarnermut Akileraartarnermullu ataatsimiititaliap sapaatip akunnerata naanerani ataatsimiinneri pillugit Siumukkormiut oqaaseqarusunngikkallartut, Inuit Ataqatigiit sinnerlugit ilaasortaq, Naaja Nathanielsen oqaaseqarusuppoq, naak ataatsimiititaliap isumaqatigiissutai qanoq ittuunersut oqaatigisinnaanngikkaluarlugit, ataatsimiinnerup inernera naammaginagu taassuma oqaatigaa.
- Aningaasat isertinneqartussat atorneqartussallu ataqatigiinnerunissaat, Inuit Ataqatigiinnit ujartugaraarput. Piffissaq qaninnerusoq pinnagu piffissarli ungasinnerusoq eqqarsaatigalugu taama ujartuilluta, Naaja Nathanielsen oqarpoq.
Aningaasanut inatsisissap aappaagumoortup amigartooruteqartussatut isumaqatigiissutaasup, amigaartoorutit ikilisarneqarnissaat pillugit, Aningaasaqarnermut Naalakkersuisoq, Vittus Qujaukitsoq qaammatini kingullerni aningaasanik mumisiterilluni pivoq.
Aningaaseriviup Grønlands Bankenip piginneqataassutaanik tuniniaanissaq oqallisaasimavoq, tamannali Siumukkormiunit piffissaq kingullerpaaq atorlugu piumaneqarani.
Aningaasat amigartoorutissat ikilisarneqarnissaannut Nuummi Qinngutsinni inissiat tuniniarneqarsinnaaneri aamma siunniunneqaraluartoq, kingusinnerusukkut allatut isummerfigineqarpoq, tamanna ukiut sisamat ingerlaneranni pisussanngorlugu.
Piginneqataassutinik inissianillu tuniniaanissat pillugit, Aningaasaqanermut Akileraartarnermullu ataatsimiititaliami Siumukkormiut ilaasortat suli iluminni isumaqatigiinngitsut, Naaja Nathanielsen oqarpoq.
- Siunnersuutit taakku suli silaannarmiittutullusooq isikkoqarput, taakku Siumukkunnit isumaqatigiissutigineqarlutik inissinneqarnissaat tassa maannakkorluinnaq utaqqisarput, Naaja Nathanielsen oqarpoq.
Siumukkormiut Inatsisartuni ilassortaatitaasa isumaqatigiinngissutaannut ilaavoq, ICC-mut tapiisarnerit ikililerneqarnissaannik Naalakkersuisut siunnersuutaat. Tamanna pillugu Naaja Nathanielsen ima oqarpoq.
- Naalakkersuisuutitaqartut tamatumunnga qanoq isummernersut suli naluara, sulili neriuutigaara ICC-mut apeqqut ilorraap tungaanut saatinneqassasoq, kisianni soorluuna tamanna neriuutissaarpasinngitsoq.
Naaja Nathanielsenip naqissuserpaa, ICC-mut tapiissutit Nunatsinnut iluaqusiilluartartuummata allanngortinneqartariaqanngikkaluartut, ingammik pisariaqartinneqarnerulernissaat eqqarsaatigalugu.
- Namminersorluta Oqartussaanerput taamaallaat ukiuni sisamani ingerlareerpoq. Taamaattumik Inuit Ataqatigiinniit isumaqarpugut inuit pisinnaatitaaffitta nakkutigineqarluarnissaat pingaaruteqarluartoq aamma demokratiip atuutsinneqarnissaa pingaaruteqarluni. ICC pissutsinut tamakkununnga tappissuuvoq sulilluarlunilu, taamaattumik ICC-mut tapiissutit ilanngarneqassappata tamanna ajuusaarnarpoq.
Inatsisartuni ilaasortaq aamma Aningaasaqarnermut Akileraartarnermullu ataatsimiititaliami ilaasortaq, Naaja Nathanielsen taama naggasiivoq.
Inatsisartuni partiit anginerit marluk isumaqatigiissutaat maanna ataasiinnaavoq, tassalu aningaasat amerlanerit Nunatta karsianut isaatinneqartariaqartut. Taama iliornissamut periutsit ilagisinnaavaat raajanut akitsuutip qaffannissaa. Akileraarutip procentimik ataatsimik qaffannissaanik Atassutip siunnersuutaa isumaqatigiinngissutaasoq oqaatigineqarluni.
Aningaasaqarnermut Akileraartarnermullu ataatsimiititaliap Inatsisartunut innersuussutaat isumaqatigiissutigineqarlutik ataatsimiititaliamit piffissami matumani atsiorneqassapput.
