Aningaasanut inatsisissaq Siumup illuatungileqqippaa

Aningaasanut inatsisissatut Naalakkersuisut siunnersuutaat Inatsisartunit aappassaaneerlugu ippassaani oqallisiginermat, Siumut siunnersuutinik allannguutaalluartussanik saqqummiussaqarpoq.
Aningaasanut inatsisissap kingusinnerpaamik marlunngorpat novembarip 15-iani pingajussaanerlugu oqallisigineqarluni akuersissutigineqassaaq:

Kalaallit Nunaanni Aningaasaqarnermut Siunnersuisoqatigiit nalunaarutaat kingulleq, Aningaasaqarnermut ataatsimiititaliap innersuussutigalugu pisortat isertitaasa aningaasartuutaasalu oqimaaqatigiissinneqarnissaat inassutigaa.
Isertitat aningaasartuutillu oqimaaqatigiissinneqanngippata, Nunatsinni atugarissaarneq ullumikkutut isikkoqartillugu attatiinnarneqarsinnaanngitsoq, Aningaasaqarnermut Siunnersuisoqatigiit oqarput.
Assersuutigalugu utoqqaat amerlanerulernerat inuussutissarsiortullu ikileriarnerat pisortat sullississutinut aningaasartuutaasa amerleriarnerannik kinguneqassaaq.

Imaaliallaannaq aaqqiissutaasinnaasunik peqanngitsoq, Aningaasaqarnermut Siunnersuisoqatigiit oqaatigaat, Aningaasaqarnermullu ataatsimiitialiamit tamanna aamma eqqumaffigineqarpoq:

- Misilittakkat tunngavigalugit nalunngilarput, tapiissuteqartarnermik aaqqissuussinerit ikilileriffiginissaat allaffissornikkullu aningaasartuutit appartinneqarnissaat qanoq ajornartigisut. Allaallumi ingerlatsinermut aningaasartuutit qaffatsaaliorneqarnissaannaalluunniit unammillernartuuvoq, Aningaasaqarnermut Ataatsimiititaliaq allappoq, Ataatsimiititaliallu isumaliutissiissutaa oqallisigineqarmat partiit tamarmik ippassaq taasinermi akuersipput.

Naalakkersuisut isumaqatigiinniarfigineqareersullu Siumup siunnersuutip pingajussaaneerneqarnissaanut atatillugu allannguutissatut siunnersuutinik marlunngorpat saqqummiussinialikkersaarpoq.

Aningaasartuutissatut allannguutigitinniakkat 150-t millionit koruunit missaanniipput, soorlu sinerissami sanaartornermut atugassat, aalisarnermut aningaasartutit, atuarfinni timersornerulernissamut aningaasartuutit, inunnullu kinguaassiuutimikkut atornerlunneqarsimasunut suliniutit.
Nunanit allanit nunatsinnut atuiniat, soorlu aatsitassarsiorniat, uuliasiorniat assigisaasallu akiliisinneqartalernissaat, Siumup siunnersuutigaa, aningaasat 332-t millionit koruunit isertitsissutaasinnaanissaat missingersuutigalugu, soorlu aamma pisuussutit uumassusillit suliareqqaarnagit avammut annissukkat akileraarusersorneqarnerisigut 60 millionit koruunit isertitsissutaasinnaanissaat missingersuutigigaat.
Tamakku katikkaanni isertitsissutaasinnaasut 392-t millionit koruunit missaanniilissapput, aningaasanullu inatsit 200-millionit koruuninik sinneqartooruteqassalluni.

Siumulli siunnersuutaa Naalakkersuisunit ilalerneqanngilaq, nunanit allanit nunatsinnik atuiniat akiliisinneqartalernissaat orniginartinngimmassuk, soorlu aamma pisuussutit uumassusillit avammut annissukkat akileraaruserneqartarnissaat orniginartinngikkaat.

Aatsitassarsioqatigiit assigisaallu akiliisinneqartalissappata nunatsinnukarusuttut ikilinissaat aarleqqutigineqarsinnaanngila?
Aleqa Hammond ima akivoq:

Naalakkersuisuulernissamik isumaqatigiissut Aleqa Hammondip aamma eqqaasitsissutigaa tassani oqaatigineqartoq, innuttaasunut ataatsimik eqquisunik inuillu akissaateqassusiat apeqqutaatinnagit akitsuutinik atuutitsilertarneq unitsinniarneqartoq

Siumup siulittaasua Aleqa Hammond ippassaq ualilluinnartoq taama oqarpoq.

Poortuutinut akitsuutit qaffannissaat aamma eqquiniaasitsinermut akitsuutip 15 procentiniit 30 procentinut qaffanneqarnissaanik siunnersuutit, 18 millioni koruuninik isertitsissutaasinnaasut, Siumut akerlerai.

Eqquiniaasitsinermulli akitsuutip qaffanneqarnissaanut siunnersuut Naalakkersuisut ippassaq unnukkut kingusissukkut tunuartippaat, naalakkersuisoqatigiit partiivini tapersersorneqanngimmat.

Aamma poortuutinut akitsuutip qaffanneqarnissaa nalorninarpoq. Taamaammat Nunatta karsiata isertitaasa aningaasartuutaasalu oqimaaqatigiinnissaannik Naalakkeersuisut siunertartik naammassiniarlugu qanoq iliussanersut pissanganarpoq.

Naalakkersuisut namminneq naliliinerat naapertorlugu tamanna angussagaanni, missingersuutini 20-millionit koruunit amigaataapput.
Tassalu apeqqutaavoq, Naalakkersuisut sipaarniassanersut imaluunniit allanik akueriuminartinneqarnerusunik isertitassarsiussanersut.

Aappaagumut aningaasanut inatsisissatut siunnersuut Inatsisartuni marlunngorpat novembarip 15-iani pingajussaaneerlugu oqaluuserineqarnera naammassippat taasissutigineqassaaq.