Aningaasanut inatsisissaq qaammammik kinguartoorsinnaavoq

Kommuninut tusarniaanerit sapaatit akunnerinik sisamanik sivisussuseqartassasut Naalakkersuisut Kanukokalu isumaqatigiissuteqarput.

Aningaasaqarnermut naalakkersuisoq, Per Berthelsen, ullumi oqarpoq, Nukissiorfiit aaqqiiffigineqarnissaat, aningaasanut inatsisissap naammassineqarnissaanut pingaarluteqarluinnartoq.

Ikaarsaariarnermi ataatsimiititaliani siulittaasut marluk Radioavisimit oqaloqatigisavut oqarput, Ikaarsaariarnermi ataatsimiititalianut tusarniaassutigineqartut ataatsimiissutigeqqaarlugit Naalakkersuisunut akissuteqassallutik.

Tusarniaassut maanna nassiussuunneqartussaq kimeqassaguni, taava inatsisissatut allatulli sanarfineqartariaqarpoq.

Qeqqata Kommunissaani ikaarsaariarnermi ataatsimiititaliami siulittaasoq, Hermann Berthelsen oqarpoq, kommuninngortussat Nukissiorfinnut immaqa allaat piginneqataasutut sunniuteqaqataasinnaanerat pillugu Naalakkersuisut siulittaasuannit saaffigineqarsimalluni.

- Kisianni oqaatigisariaqarpara, maannakkut isumaqatigiissuteqannginnatta. Tusarniaassummik atuarnissaanut qilanaarpugut, akissutertigatali tunuliaqutivut oqaloqatigeqqaartariaqarpavut, Hermann Berthelsen Radioavisimut oqarpoq.

Aamma Qaasuitsup Kommunissaani borgmesteriulersussaq, Jess Svane oqarpoq, Nukissiorfiit pillugit paassissutissanik sukumiinerusunik tigusaqartinnani ikaarsaariarnermilu ataatsimiititaliami oqallittoqareertinnagu, aalajangiinissamut pisinnaatitsissummik peqarani. Pingaartippaali, kommuninngortussat Nukissiorfinni oqartussaaqataanissaat, minnerunngitsumik akitigut.

Aningaasanut inatsisissatut siunnersuut allannguutilik Naalakkersuisunut aqagu ullaap tungaani saqqummiunneqassaaq.