Aningaasanut inatsisissaq piariilerpoq
Nunatsinni sulisinnaasutut nalunaarsorneqarsimasut suliffissaqanngitsullu, aningaasanut inatsisissatut siunnersuummi qanoq iliuuseqarfigineqarnissaat naatsorsuutigineqarpoq.
Naalakkersuisooqatigiit 2009-mi Nunatsinni oqartussaalermatali, illoqarfinni suliffissaqanngitsut 20 procentimik ulloq manna tikillugu amerleriarsimapput. 2009-mi suliffissaaleqisut 2.138-aasimasut juulimi ukioq manna 2.566-iullutik.
Tassalu tamannarpiaavoq, Naalakkersuisut siulittaasuata, Kuupik V. Kleistip maajip aallaqqaataasiornermi oqalugiaammini eqqartugaasa ilagilluinnagaat.
Kuupik V. Kleistip oqalugiarnermini isertuutinngilaa, suliffissaaleqineq innuttaasunit amerliartuinnartunit atugaammat, neriorsuutigalugulu Naalakkersuisut anguniagarigaat suliffissanik pilersitsiortornissaq, taamaasiornikkut suliffissaaleqinerup appartikkiartornissaa siunertarineqartoq oqaatigalugu.
2013-imut aningaasanut inatsisissatut siunnersuutip ullumi saqqummiunneqarnerani, suliffissaqanngitsut suliffissaqartilernissaat eqqarsaatigalugu, Naalakkersuisooqatigiit qanoq iliuuseqassanerminnik oqariartuuteqarnissaat naatsorsuutigineqarpoq.
- Suliffissaaleqinerup akiorneqarnissaanut immikkut aningaasaliisoqarnissaa naatsorsuutigaara. Aningaasallu qanoq atorneqarnissaat eqqarsaatigalugu, naatsorsuutigilluinnarpara suliffeqarnermi illuatungerisat tamanna pillugu suleqatiserineqarumaartut, Kalaallit Nunaanni Sulisitsisut Peqatigiiffiata allaffeqarfiani pisortaq, Karsten Klausen oqarpoq.
Taanna aamma oqarpoq, suliffissaaleqinerup akiorneqarnissaanut aningaasaaliineq kisimi naammanngitsoq, oqarlunilu immikkut aningaasaliissutit, isumatusaarnikkut suliffeqarnermilu illuatungerisat eqqortut suleqatiginerisigut agguataarneqartariaqartut.
- Aningaasanut inatsimmi 2012-imut aningaasaliissutigineqartussat eqqarsaatigalugit, GA-miit SIK-miillu isumaqarpugut, aningaasat suliffissaaleqinerup akiorniarneranut atorneqarsimanngitsut, aningaasammi iluamik agguataarneqarnissaat suliffeqarnermi illuatungeriit eqqortut suleqatiginerisigut iluatsissinnaagaluaraluarpoq, Kalaallit Nunaanni Sulisitsisut Peqatigiiffiata allaffeqarfiani pisortaq, Karsten Klausen oqarpoq.
Aningaasanut inatsisissatut 2013-imut siunnersuut, Aningaasaqarnermut Naalakkersuisup, Maliina Abelsenip erngiinnaq nalunaaqutaq ataatsimut saqqummiutissavaa.
