Aningaasanut inatsisissaq oqallisigilerpaat
Siunnersuisoqatigiit nalunaarusiaat aasaq juunimi saqqummertoq ilaatigut ima imaqarpoq:
- Aningaasarsiornikkut politikkimut tunngavissat allanngorluinnarsimasut erseqqissigaluttuinnarpoq. Aatsitassat uuliallu akii qaffarujussuarsimapput, appaqqikkallarnissaallu ilimananngilaq. Taama ineriartornerup malitsigisaanik Kalaallit Nunaanni sillimmatinik uumaatsunik qalluisinnaanermullu periarfissat uuliasiorfissuit aatsitassassiorfissuillu takusinnaaleriartorpaat, naak qalluilernissamut assartuinissamullu aningaasartuutit suli qaffasikkaluartut. Taama siunnersuisoqatigiit ilaatigut inerniliipput.
Maniitsumilu alumiiniuliorfissaq pillugu ima ilaatigut allapput:
- Pilersaarut piviusunngortinneqassappat, 2014-imi aallartisarnerani Maniitsumiinnaq sulisut 650-it pisariaqartinneqassapput, sanaartorneranilu suli amerlanerusut sulisuussallutik.
Kisianni aningaasaqarnermut siunnersuisoqatigiit aamma mianersoqqusipput:
- Alumiiniuliorfissaq Kalaallit Nunaata iluaqutigissappagu, aningaasarsiornermi politikkimi unamminartut ilisimanissaat pingaarluinnarpoq. Taamaanngippat inuussutissarsiutini allani unammillertuni – soorlu aalisarnermi – ajornartorsiortoqalersinnaavoq.
Alcoa-p Islandimi ingerlataani takuneqareerpoq, aningaasarsiornikkut politikki qasungavallaarpat, ingasammik aallartisarnermi aningaasarsiat akillu malunnaatilimmik aqukkuminnatsumillu qaffakkiartupiloorsinnaasut. Nunatta Aningaasaqarnera pillugu siunnersuisoqatigiit nalunaarusiaminni kingullermi allapput.
