Aningaasanut inatsisissaq naggataarutaasumik oqaluuserissavaat

Inatsisartut ukiaanerani ataatsimiinnertik naggaserlugu tassuugu ataatsimut ataatsimiissapput, ataatsimiinnerlu naggaserlugu aningaasanut aappaagumut inatsisissaq ukiunullu tulliuttunut missingersuut oqaluuserineqassaaq, oqallittoqangaatsiarnissaalu naatsorsuutigineqarpoq.

Aningaasanut inatsit ullumikkut naammassiarneqartussaassaaq, akuersissutigineqarnissaalu Naalakkersuisut amerlanerussuteqarnertik atorlugu qularnanngitsumik isumagissavaat. Apeqqutaasorli tassaavoq, naalakkersuisunut illuatungiliuttut akerliullutik taasissanersut, taamaassappallu siullermeerlutik taamaaliussallutik.

Atassutilli Demokraatillu narrutsassimapput, ilassutitut imaluunnit tapiliullugu isumaliutissiissutip pingajussaaneerneqarnerani atsioreersoriniarlutik atsiugaq tunuartinneqarmat atortussaajunnaarsinneqarluni. Illuatungiliuttut isumaqarsimagaluarput, isumartik malillugu illersorneqarsinnaasumik aningaasatigut politikkissamik atsioqataasimallutik.

Maannali paasinarsivoq, Siumut aamma Inuit Ataqatigiit pilersaarutiminnik allanngortitsisut, ilaatigut ilisimatusarfissarsuup Ilimmarfiup aamma erninermi sulinngiffeqartarnerup sivitsorneqarnissaanut suliniutit allallu kinguartinniarlugit suliniutigilermassuk. 

Aningaasaqarnermut ataatsimiititaliami siulittaasoq Ole Thorleifsen pisut kingulliit tunngavigalugit ilassutissatut imaluunnit tapiliussatut isumaliutissiissut ippassaq tunuartippaa, taamaalillutik Atassut aamma Demokraatit danskisut atsioqataaffigisaraluat atorunnaarsillugu.

Inatsisartuni ualeru oqallisingaatsiartoqarnissaa taamaalilluni paasinarsivoq. Inatsisartut tassuugu nalunaaqutaq ataatsimut ataatsimiissapput.