Aningaasanut inatsisissaq iluarssaaqinnissallu ulapputalersut

Nunatta Karsianit aningaasat aniasut unitseriarniarlugit Naalakkersuisut iluarsaaaqqinnissat sukkanerusumik aallartilerpaat. Aningaasaqarnermut naalakkersuisup, Palle Christiansenip, naatsorsuutigaa, akilerartarneq atugarissarnerlu pillugit isumalioqatigiissitaq aggustimi aallartissasoq. Aamma Nunatta aningaasaqarnera pillugu siunnersuisoqatigiinnik pilersitsinissani naatsorsuutigaa. Kiisalu nunami immikkoortut pillugit pilersaarumik, najugaqariaatsit qanoq ittuunissaannik aningaasarsiornikkullu inerfiartorfissanik qulajaasussamik, qanittukkut aallartitsisoqassaaq.
Allattoq Jens Thorin
juulip 29-at 2009 15:20

Kisianni aningaasat Nunatta Karsianit aniasut unitsinnissaat suliassani siullersaasoq, Palle Christiansen oqarpoq.

- Inuit amerlanerusut sulilersikkusuppavut. Tamatuma angunissaanut akilerartarneq atugarissarnerlu pillugit isumalioqatigiissitamit, qaammatip tulliani pilersitassatsinnit inassuteqarfigineqarusuppugut.

Taakkunanga inassutit inernerissavaat, inuit amerlanerusut sulilernerat aammalu pisortanit tapiissutinik inuussuteqartut, sulisinnaasusiat naapertorlugu tapiissutisiaata angissusilerneqartarnissaat, Palle Christiansen oqarpoq.

Aamma nunaqarfiit, najugaqariaatsit, nunaqarfinnilu tunitsivippassuit, pisortanit taperneqarlutik ingerlasut Naalakkersuisut isiginiarpaat. Aaqqissuussaaneq ukiamiit misissoqqissaarneqassaaq, sumi najugaqarnissatsinnut sulinissatsinnullu, aammalu aningaasarsiornitta qanoq ittuunissaanik isummernissatsinnut tunngaviuisussamik. Attanneqarsinnaasunik innuttaasullu tatigisinnaasaannik aaqqiisoqarnissaa misissueqqissaarnerup qulakkeerniassavaa.

Kisianni Palle Christiansenip erseqqissaraa, Nunatta Karsiani putorsuup matuniarnissaa unammilligassani pingaarnerpaasoq. Tassalu amigartoorujussuartarnerit ukiuni kingullerni takusavut uteqqinneqassanngillat.

- Ingerlatsinermut sanaartugassanullu aningaartuutit qanoq atortarnerivut misissussavagut. Taavalu sumut atukkiisarnerluta aamma misissusallutigit, aningaasaqarnermut naalakkersuisoq oqarpoq.

Nangilluni oqarpoq, akileraarutinik akitsuutinillu inuinnarnut eqquisussamik qaffaanissaq siunertarinngikkitsik.

- Sulinissaq kajuminnarunnaassanngilaq. Taamaamat akileraarutit qaffannissaat siunnersuutaanngilaq, Palle Christiansen oqarpoq.

Taamaakkaluartorli imaassinnaavoq pisiassat ilaat akitsuuserneqartut imaluunniit akitsuutaat qaffattut.

- Kisianni tamanna novembarip naalernerani aatsaat paasinarsissaaq, Inatsisartut aalajangertussaammassuk, Palle Christiansen oqarpoq.

Taassuma ilangullugu oqaatigaa, suliassat naalagaaffimmik suliarineqartartut ilaat Namminersorlutik Oqartussanit tiguneqarniassammata, aningaasanut inatsisit tullii sinneqartooruteqarfiusariaqartut.

- Suliassaqarfiit Namminersorlutik Oqartussanit tiguneqarsinnaasutut allattorsimasut amerlaqaat, tigusinerillu tamarmik aningaasartuutinik malitseqassapput. Taamaammat Nunatta Karsiani siunissami sinneqaartooruteqartariaqarpugut, Palle Christiansen oqarpoq.

Taassuma ilanngullugu oqaatigaa, aappaagumut aningaasanut inatsisissaq Naalakkersuisut aggustip arfernanni ataatsimiinnerminni akuersissutigissagaat, tamatumalu kinguninnguani inatsimmi kisitsisit pingaarnerit saqqummiutissagini. Kisianni 2010-mi aningaasanut inatsisisaq tamarmi septembarip aallaqqaataani aatsaat saqqummiunneqassaaq.