Aningaasanut inatsisissaq ataatsimiinnermi qitiusutut inissisimavoq
Inatsisartut ukiuunerani ataatsimiinnertik ullumi nangissavaat.
Aningaasanut inatsisissaq sapaatip-akunnera kingulleq naammassisassaagaluaq, ammaanersiornermi oqallinneq sivitsormat, siullertut ullumi oqaluuserineqassaaq.
Amigartoorutissat oqallinnermi oqallisaangaatsiassagunarput, taakku 70 mio. koruuniunissaat siunnersuutaavoq.
Naatsorsuutit amigartoorfiunatillu sinneqartoorfiussannginnerat tunngavigalugu 140 mio. koruuninik sipaarnissaq Demokraatit siunnersuutigaat, inatsisartullu ataatsimoorlutik sipaarniutissanik ujarleqqugaat, aningaasaqarneq pillugu Demokraatini oqaaseqartartoq, Lene Knüppel, oqarpoq.
Demokraatilli sipaarniuteqaqqusinermik siunnersuutimik akuersissutigineqarnissaa ilimagissanngilaat. IA-mmi aningaasaqarnermut oqaaseqartartuata, Johan Lund Olsenip, iluarsisassaqarnerarpaa, Demokraatilli sipaarniaqqusinerat piviusunngortinneqarsinnaanngitsoq oqarluni.
