Aningaasanut inatsisissaq assortuussutaavoq

Inatsisartuni ippassaq oqallinneq aningaasanut inatsisissap oqaluuserineqarneranik naggaserneqarpoq. 2005-imut aningaasanut inatsisissap oqaluuserineqarnerani saqqummiunneqartut, pisarnertut illuatungeriissutigineqarput.

Naalakkersuisooqatigiit Siumut Inuit Ataqatigiillu sinnerlugit oqaaseqartunit aningaasanut inatsississap pitsaaqutai iluaqutissaalu salliutillugit saqqummiunneqarput.

Inuit Ataqatigiit sinnerlugit oqaaseqartup Ane Hansen-ip oqaaseqarnermini tikkuarpaa aningaasanut inatsissatut siunnersuutigineqartoq nunatta namminersuleriartorneranut takussutissaalluartoq. Erseqqissaatigaa nunatta Danmarkimut aningaasaqarnikkut pisariaqartitsinera inatsisissap takutikkaa.

Aningaasarsiornerup ilorraap tungaanut aallarnissaa siunertaralugu aningaasat inuiaqatigiinni kaaviaartitaasut amerlanerulernissaannik Naalakkersuisut sulissuteqarusunnerat Ane Hansen-ip nuannaarutiginerarpaa.

Partiit naalakkersuisoqaatigiit saqqummiussaannut akerliusumik  illuatungiliuttut Atassut aamma Demokraatit aningaasanut inatsisissap ilusaanut isorisaqangaatsiarput.

Atassummit annerusumik isorineqarpoq innaallagissap, erngup kiassarnerullu akiisa assigiikkunnaarnissaat pillugu siunniunneqartut. Atassut isumaqarpoq allannguinissamik pilersaarut eqqarsaatigilluangaanngitsoq, tassungalu atatillugu aappaagu aningaasatigut amigartooruteqarnissaq tikkuartorneqarpoq, aappaagumi 35 millioni koruuninik amigartoortoqarnissaa Atassutip ernummatigaa.

Demokraatit aamma isorinnipput. Akit assigiikkunnaarsinneqarnissaannut tunngaviusumik isumaqataagaluarlutik tikkuarpaat tusarniaanermi apeqqutinut assigiinngitsunut Naalakkersuisut isummersimanngitsut. Taamaallillutik naalakkersuisut inatsisartunut piumasaqarput kingunnissaa qulakkeerneqanngitsumik aalajangeeqqullutik, tamannalu naammaginanngilaq, Demokraatit oqaaseqartuat Per Skaaning oqarpoq.

Tamanna pillugu Demokraatinit allatut aaqqissuussinissaq ujartorneqarpoq. Per Skaaningip oqaaseqarnermini aningaasanut inatsisissap suliarineqarnera tukappallaarnerarlugu oqaatigaa taamaalilluni Aningaasaqarnermut ataatsimiititaliaq qanoq isummernissamut iluamik tunngavissinneqanngitsoortoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat