Aningaasanut inatsisissaq assortuussutaajualersoq naammassivoq
Aningaasanut inatsisissaq illuatungeriinnit assortuussutaaqisoq amerlanerussuteqartunit, tassa naalakkersuisooqatigiit partiivinit akuerineqarpoq.
- Suliassat annertuut oqimaatsullu piffisami sivisuallaanngitsumi inatsisartut oqaluuseralugit naammassivaat, tamannalu nuannaarutigaara, naalakkersuisut siulittasuat Hans Enoksen oqarpoq.
Aningaasaqarnermut naalakkersuisoq Josef Motzfeldti isumaqarpoq aningaasanut aappagumut inatsisissaq ataaqatigissaagaasoq, naalakkersuisullu siunnersuutaat innarlerneqangaanngitsoq.
- Killeqartumik nakkutigineqartumillu inatsisissaq amigartooruteqrfiuvoq, Inuiaqatigiinnullu pingaarutillit, soorlu akit assigiikkunnaarnissaat, akileraartarnermi allanngutissat, ilinniartitaanermik annertusaanissaq, inuussutissarsiutitigullu siuarsaanissaq, taakua tamarmiullutik ilivitsuullutillu akuerineqarput, aningaasaqarnermut naalakkersuisoq Josef Motzfeldt IA-meersoq oqarpoq.
Atassutip oqaaseqartitaa Jakop Siverthsenip oqaatigaa inatsisissatut siunnersuut kingulleq piffisami taama sivikitsigisumi agguaaneqarmat, naalakkersuisuniillu allanngortiterneqareermat Atassummit atsioqataannginnerminnut pissutaasoq. Atassummimmi isumaqarsimagaluarput inatsisissaq partiit tamarmik atsiugaat akuerineqartariaqartoq.
