Aningaasanut inatsisissaq aappaagumoortoq akuersissutigineqarpoq

Partiit naalakkersuisuutitallit taamaalillutik aningaasanut inatsisissatut siunnersuutaat siulleq akuersissutigineqarpoq:

- Nunatta aningaasaqarniarnerata aaqqiiviginiarneqarnissaanut alloriarneq siulleq tiguarput, aningaasaqarnermut naalakkersuisoq Palle Christiansen Radioaviisimut oqarpoq.

Aningaasanut inatsisissaq pillugu taasisoqarmat 15-it akuersipput qulillu itigartitsillutik.

Nunatta Karsiani isertitai, aammalu ingerlatsinermut sanaartugassanullu aningaasaliissutit taamaalillutik ukiorpaalunni siullermeertumik oqimaaqatigiissapput. Tamannami nunatta aningaasaqarneranik Naalakkersuisoqatigiit iluarseeriarnerannut tunngaviuvoq. Tassalu aamma 2013-imi aningaasanut inatsisissatut missingiussami 100 millionit koruuninik sinneqartooruteqarnissaq naatsorsuutaalerpoq.

Naak aningaasanut inatsit sipaarfiugaluartoq, atugarissaarnikkut arlalitsigut pitsanngoriarfeqartitsissaaq. peqqinnissaqarfimmi utaqqisut ikilisarnissaannut aningaasaliissutit ilaneqarput, aamma Innarluutillinnut aningaasaliissutit amerlipput. Isumaginninnermut atugassat 25 millionit koruuninik ilapput, taakkualu kinguaassiuutimikkut atornerlunneqarsimasut katsorsarneqartarfissaannut, aamma meeqqanut suliniutinut atorneqassapput. Taakkua saniatigut tusagassiutit ineriartortinneqarnissaannut anuingaasaliisoqarpoq, soorluttaaq nunaqarfinnik ineriartortitsinissaq aningaasaliiffigineqartoq. Kiisalu siusinaartumik utoqqalinersiutit utoqqalinersiutillu nalinginnaasut aappaagu juulip ulluisa aallaqqaataanniit qaffassallutik.

Aningaasanut inatsimmi 6 milliardit koruuninik aningaasartuuteqarnissaq ilaavoq. 227 millionit koruuninik amigartoorfiunissaa missingiunneqarpoq, ilaatigut Nukissiorfiit erngup nukinganik innaallagissiorfiliornissaanut atukkiisoqassammat.