Assi: KNR

Aningaasanut inatsisissap oqimaaqatigiiffiunissaanut 180 millionit koruunit amigaataasut

Aningaasanut inatsit amigartoorfiussanngippat 190 millionit koruuningajaat nassaarineqartariaqarput. Akileraarutitigut oqilisaanneqarnissamik taamaatiinnartariaqartut, Naalakkersuisut paasissutissiipput.

Aamma ukioq manna aningaasanut inatsisissamut tunngaviusunik missingersuutit amigartooruteqarfiupput.

Tunngaviusumik missingersuutit aningaasanut inatsisissaq pillugu isumaqatigiinniarnerni aallaaviusussat 461 millionit koruuninik maannakkut amigartooruteqarfiupput. Aamma aningaasanut inatsisissap siuliisa marluk tunngaviusumik missingersuutaat amigartoorfiupput, 459,5 millionit koruuninik siorna amigartooruteqarfiullutik.

Naalagaaffimmilli ataatsimoortumik tapiissutit akigititanut akissarsianullu iluarsiivigineqarnerat ukiumi matumani tunngaviusumik missingersuutini ilanngunneqanngillat. Taakkua 275 millionit koruuninik isertitaqaataanissaat naatsorsuutigineqarpoq. Tassalu aningaasanut inatsisissaq ukiuni sisamani oqimaaqatigiiffiussappat 186 millionit koruuninik nassaartoqartariaqarpoq.

Inuit Ataqatigiit sakkortuumik isornartorsiuisut

Inuit Ataqatigiit siulittaasuata, aningaasaqarnermut akileraartarnermullu ataatsimiititaliamut ilaasortaasup, Múte B. Egedep Naalakkersuisut Sermitsiaq.ag-mit apersorneqarluni sakkortuumik isornartorsiorpai. Amigartooqqaneq nunatta aningaasaataasa akisussaassuseqanngitsumik aqunneqarnerannik takussutissaasoq Egede isumaqarpoq.

Ataatsimiititaliap kissaataatut soorlu isertitakinnernut akunnattumillu isertitalinnut inummut ilanngaat tunngaviusumik missingersuutit amigartoorfiunerata kingunerisaanik qaffanneqassanngitsoq maannakkut ersereerpoq.

Tamatumunnga peqatigitillugu sulinermut ilanngaat, naalakkersuisoqatigiit isumaqatigiissutaanniittoq, maannakkut allanngortinneqassanngilaq. 

Ilanngaatit qaffanneqarnissaat maanna akissaqartinneqanngitsoq Naalakkersuisut aningaasaqarnermut akileraartarnermullu ataatsimiititaliamut paasissutissiissutigaat.

Allaannguutit kissaatigineqartut akileraarusersuinikkut tunngavigisaq 700 mio. kr.-t missaannik annikinneruneranik kinguneqassapput.

Vittus ernumanngilaq

Aningaasanulli inatsisissaq pillugu isumaqatigiinniarnermi missingersuutit tunngavigineqartut amigartooruteqarfiunerat aningaasaqarnermut naalakkersuisumut, Vittus Qujaukitsumut, ernumalersitsinnilaq.

- Taamaalilluni maannakkorpiaq tunngaviusumik missingersuutaagallartut amigartooruteqarnissamik takutitsimmata eqqorpoq, taamaakkaluartoq Naalakkersuisut aningaasaqarnikkut ingerlatsinerminni aningaasanut inatsisip inaarutaasup oqimaaqatigiissaarfiunissaa akueraat. Taamaattumik tamanna siunnerfigalugu naalakkersuisut maanna suliniuteqarput – tamannalumi aamma angussaqaarparput, Vittus Qujaukitsoq allappoq.

Tamatuma saniatigut tunngaviusumik missingersuutit ukiuni kingullerni amigartooruteqarfiunerat taassuma innersuussutigaa. Naalakkersuisut aningaasanut inatsimmik sulinerminni tunngaviusumik missingersuutaat amigartooruteqarfiugaluartut aningaasanut inatsisinik oqimaaqatigiiffiusumik naammassisareerlutik taassuma erseqqissaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat