Assi: Simon Uldum

Aningaasanut inatsisissap isumaqatigiinniutigineqarneranut peqataatinneqarnissaq IA-p piumasaqaatigigaa

Danmarkimi aningaasanut inatsisissaq danskit partiivinit isumaqatigiinniutigineqalerpat Inuit Ataqatigiit aggersarneqarnissartik piumasaqaatigaat.

Aviisi Berlingske ullumi taama allaaserisaqarpoq.

Folketingimut sisamanngorpat qinersinissaq sioqqullugu kina Danmarkimi ministeriunertut tapersersorniarnerlugu siumut toqqaareerniaratik Inuit Ataqatigiit nalunaarutigaat. Inuit Ataqatigiit taamaaliorput isumaqaramik Danmarkimi saamerliusut Helle Thorning-Schmidtimit siuttuuffigineqartut kalaallit soqutigisaannik ukiuni kingullerni sisamani naammaginartumik isumaginnissimanngitsut.

Tamatumunngalu ilaatigut Pituffimmi kiffartuussinissamik isumaqatigiissut puisillu amiinut tunngasoq assersuutissaasut partiimit oqaatigineqarpoq.

AAMMA ATUARUK Aviisi: Danmarkimi amerlanerussuteqartut Atlantikup avannaamiut qinersinermut sunniuteqarnissaat kissaatiginngilaat

- Folketingimi ilaasortat partiillu allat naligalugit folketingimut ilaasortaavugut, tamannalu danskit naalakkersuisuisa puigorsimavaat. Aningaasanut inatsisissap isumaqatigiinniutigineqarneranut ataasiarlutaluunniit qaaqquneqasimannginnerput assut ippigivarput. Pisussaannartut isigineqarpugut, Inuit Ataqatigiit siulittaasuat Sara Olsvig Berlingskemut taama oqarpoq.

Aningaasanut inatsisissaq ukiaq isumaqatigiinniutigineqarmat partii qaaqquneqaraluarpoq, Inuit Ataqatigiilli suli ataatsimeeqatigineqanngitsut danskit aningaasaqarnermut ministeriata Bjarne Corydonip isumaqatigiissuteqarluni isumaqatigiinniarnerit naammassivai.

Sara Olsvigip ilanngullugu oqaatigaa Danmarkimit suli oqartussaaffigineqartut, pinerluttunik isumaginnittoqarfik aamma illersornissamut tunngasut pillugit isumaqatigiinniarnerni partii aamma peqataatinneqarsimanngitsoq

USA-p Pituffimmi sakkutooqarfimmik atuineranut tunngatillugu Nunatta, Danmarkip USA-llu akornanni illersornissamik isumaqatigiissutaasup isumaqatigiinniutigeqqinneqarnissaa Inuit Ataqatigiit piumasaqaataasa ilagaat.

AAMMA ATUARUK Doris Facebookimi: IA-mik qinersinerup Dansk Folkepartimik qinersineq assigiinnarpaa

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat