Aningaasanut inatsisissap isornartorsiorneqarnera Qujaukitsup illuatungilerpaa
- Angusarput naammagisimaarpara, aamma Inatsisartut partiit arfineq-marluusut akornanni tallimat akuersisinnaammata soorunami qujavunga aamma angusaq tamanna aamma naammagisimaarluinnarpara, Aningaasaqarnermut naalakkersuisoq Vittus Qujaukitsoq, Nunatta Qitornaanneersoq, taama oqarpoq.
AAMMA ATUARUK Aningaasanut inatsit amerlanerussuteqarluartut akueraat
Partiit marluk akuerseqataanngillat
Partii Naleraq Suleqatigiissitsisullu partiini kisiartaallutik akuersinngillat.
Inunnik isumaginninnermi sullissinerup annerusumik pitsanngorsaavigineqannginnera oqaatigalugu, Suleqatigiissitsisut aappaagumut aningaasanut inatsisissamut akuersaqataajumaanngillat. Oqaaseqartitaat Tillie Martinussen oqaaseqarnermini taama oqarpoq. Suleqatigiissitsisulli oqaasii Vittus Qujaukitsup illuatungilerpai:
- Isumaqarpunga tamanna Suleqatigiissitsisut nammineq akisusaaffigigaat. Uagut nunatta ataatsimut isigalugu atukkatigut pitsanngorsaanissaq aammalu siuariartortitsinissamut sinaakkutit pitsaanerulersinnissaat inuit amerlanerusut sulilersinneqarnissaat, ilinniartartut naammassinnittartut amerlanerusut periarfissinneqarnissaat, minnerunngitsumillu inuiaqatigiittut aaqqissuussaanitsinni allaffissornerup annikillisarneqarnissaa ilaatigut aaqqisuunneqalermat massakkut naammagisimaarpara, Vittus Qujaukitsoq taama oqarpoq.
AAMMA ATUARUK Aningaasanut inatsit amerlanerussuteqarluartut peqataaffigaat
Suleqatigiissitsisut isornartorsiuinerat illuatungilerpaa
Tillie Martinussenip, aningaasanut inatsisissap pingajussaaneerneqarneranut atatillugu oqaatigaa kinguaassiutitigut atornerlunneqarsimasut kingunerlutsitsisut sullinneqarnerat amigartoq, sullinneqarnerallu aningaasanut inatsisissami pitsanngorsaavigineqanngitsoq. Vittus Qujaukitsoq taasunga atatillugu ima oqarpoq:
- Ilumuunngilaq uani kinguaassiutitigut atornerluisarnermut tunngatillugu iliuuseqarnermut atornerlunneqarsimasut kingunerlutsitsisut pillugit ilisimatusarnikkut apersuinernik, taavalu ikiugassanut immikkoortitsisarnermi suleqatigiinnerup suleqatigiit akimorlugit aaqqissuunneqarnissaannut immikkut iliuuseqalerpugut, Vittus Qujaukitsoq oqarpoq, nangillunilu:
- Taassuma qaavatigut aamma isumaginninnerup tungaatigut ulloq unnuarlu saaffiginnittarfimmut oqarasuaatikkut saaffigineqarsinnaasumut aningaasaliissutit aamma amerlineqarput, imminorniarlutillu sioorasut imaluunniit atornerluisut atornerlunneqarsimasullu ikiorneqarnissaannut saaffissaq ulloq unnuarlu ammasartussanngorlugu aningaasaliiffigivagut, taamaattumik isumaqatiginngilara taamatut oqariartuuteqartoqarnera, Aningaasaqarnermut naalakkersuisoq Vittus Qujaukitsoq taama oqarpoq.