Assi: Angu Motzfeldt

Aningaasanut inatsisip tamanit isumaqatigiissutiginissaanut millionialunnguit akornutaapput

Aningaasat fem millioner koruunit isumaqatigiinngissutaasut Naalakkersuisunit isumaqatigineqartuuppata, Inuit Ataqatigiit aningaasanut inatsimmut atsioqataassinnaalluaraluarput.

Aningaasanut inatsit piareerluni saqqummiunneqartussanngorpoq. Tamanna Naalakkersuisooqatigiinnit isumaqatigiissutigineqarluni ullaap tungaa atsioqatigiissutigineqarpoq.

Naak Inuit Ataqatigiit atsioqatigiinnermi peqataanngikkaluarlutik, taamaattoq partiip neriuutigaa, inatsisissaq Inatsisartuni tallimanngorpat pingajussaaneerlugu oqallisigineqarnerani tamanna partiinit amerlanerpaanit isumaqatigiissutigineqarumaartoq.

Tamanna pillugu Inuit Ataqatigiit aningaasaqarneq pillugu oqaaseqartartua, Naaja Nathanielsen ima oqarpoq.

- Tallimanngorpat oqallisigineqarpat tamassumunnga isumaqataaniarata oqarnikuunngilagut. Isumaqataallutali taasissaguatta siunnersuutigut marluusut ilanngunneqartariaqarput, taakkulu katillugit 5 millioner koruuninik aningasartaqarput.

Taakku 5 millioner koruunit isumaqatigiinngissutaasut tassaapput Inuit Ataqatigiit siunnersuutaanni, aningaasat Piareersarfinnut atugassiissutaasut ilaat, soorlu højskolertitsinernut allanullu tamassumunnga assigusunut aningaasaliissutigineqarnissaat.

Aamma atuaruk Naalakkersuisoq: Piareersarfiit aningaasaliiffigineqassapput

Højskolenulli allanullu tamassumunnga assigusunut 8 millioner koruunir Inuit Ataqatigiinnit siunnersuutigineqaraluarput. Tamannalu naalakkersuisunit ilalerneqarluni 3 millioner koruunit illuartinneqarput. Tassalu sinneruttut 5 millioner koruunit tassa isumaqatigiinngissutaallutik.

Millionialunnguit avissaartuutsitsipput

5 millioner koruunit aningaasanut inatsit eqqarsaatigalugu annikittunnguatut isigineqarsinnaagaluarput. Taakkuli atorneqarsimasuuppata Inuit Ataqatigiit atsioqataasimassagaluartut, Naaja Nathanielsen oqarpoq.

- Taamaaliortoqarsimasuuppat tamanna Naalakkersuisut tungaanniit inuiaqatigiinnut nalunaarutaassagaluarpoq pitsaalluinnartoq.

Inuit Ataqatigiit tungaanniit høsjskolenut allanullu tamassumunnga assigusunut aningaasat 5 millioner koruunit isumaqatigiinngissutaasut annertugisassaanngitsutut isigineqarput. Taamaattumik Inuit Ataqatigiit isumaqarput Naalakkersuisooqatigiit tamassumunnga angiinnarsimasussaagaluartut partiit amerlanerit isumaqataassappata.

- Isumaqatigiinnissaq eqqarsaatigalugu piumasaqaatigut taakku akuereqqunaqaat, tassalu tassanngaanniit aallartittoqarluni.

Aamma atuaruk Aningaasanut inatsissap naammassineqarnissaa sulissutigineqaleruttorpoq

IA isumaqataqasinnaalluarpoq

Aningaasanullu inatsissaq tallimanngorpat oqallisigineqarpat Inuit Ataqatigiillu siunnersuutaat tamanna ilalerneqarpat, taava Inuit Ataqatigiit piareersimapput aningaasanut inatsimmut taaseqataallutik isumaqataanissaminnut.

- Aatsaalli tamanna isumaqatigineqarpat taaseqataassaagut.

Inuit Ataqatigiit aningaasaqarnermut tunngasunut oqaaseqartartua, Naaja Nathanielsen taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat