Aningaasanut aappaagumut inatsisissaq unnugu naammassineqassaaq.

Inaarutaasumilli oqallinneq pissanganartorsiornanngitsuunngilaq. Inatsisartut siulittaasuat oqaluttunut arlaleriarluni akuliuttariaqartarpoq, oqalunniartullu killilertariaqartarlugit. Nalunaaqutaq tallimanut tanneq arfineq pingasunngortorlu Siumut naalakkersuisunik tatiginnikkunnaarnissamik siunnersuuteqarpoq, aningaasanut inatsisissatut siunnersuut aappassaaneerneqarmat saqqummiussaminnut assingusumik.

Illuut A/S pillugu Naalakkersuisut kommuninut ilumut isumaqatigiissuteqarsimanersut, erseqqissumik paasitinneqarsimannginnamik Siumumeersut naammaginninngillat. Kisianni aningaasanut inatsisissap appassaaneerneranitorluinnaq, Naalakkersuisoqatigiit pinngitsoortitsinissamik saqqummiussaqarput, unikaallannerullu kingorna aningaasanut inatsisissaq oqaluuserineqaqqilerpoq.

Aningaasanut inatsisissaq kusassakkanik kisitsisitaqarluni suliarinerlutaasoq, illuatungiliuttut oqaatigaat. Partiilli naalakkersuisuutitaqartut aningaasanut inatsisissap naammassineqarnera iluarisimaarpaat. Nunatta Karsiani isertitai, aammalu ingerlatsinermut sanaartugassanullu aningaasaliissutit taamaalillutik ukiorpaalunni siullermeertumik oqimaaqatigiissapput. Tamannami nunatta aningaasaqarneranik Naalakkersuisoqatigiit iluarseeriarnerannut tunngaviuvoq. Tassalu aamma 2013-imi aningaasanut inatsisissatut missingiussami 100 millionit koruuninik sinneqartooruteqarnissaq naatsorsuutaalerpoq.

Naak aningaasanut inatsit sipaarfiugaluartoq, atugarissaarnikkut arlalitsigut pitsanngoriarfeqartitsissaaq. peqqinnissaqarfimmi utaqqisut ikilisarnissaannut aningaasaliissutit ilaneqarput, aamma Innarluutillinnut aningaasaliissutit amerlipput. Isumaginninnermut atugassat 25 millionit koruuninik ilapput, taakkualu kinguaassiuutimikkut atornerlunneqarsimasut katsorsarneqartarfissaannut, aamma meeqqanut suliniutinut atorneqassapput. Taakkua saniatigut tusagassiutit ineriartortinneqarnissaannut anuingaasaliisoqarpoq, soorluttaaq nunaqarfinnik ineriartortitsinissaq aningaasaliiffigineqartoq. Kiisalu siusinaartumik utoqqalinersiutit utoqqalinersiutillu nalinginnaasut aappaagu juulip ulluisa aallaqqaataanniit qaffassallutik.

Aningaasanut inatsimmi 6 milliardit koruuninik aningaasartuuteqarnissaq ilaavoq. 227 millionit koruuninik amigartoorfiunissaa missingiunneqarpoq, ilaatigut Nukissiorfiit erngup nukinganik innaallagissiorfiliornissaanut atukkiisoqassammat.