Sikkilernersuaq Tour de France aqagu aallartittussaq nuanninngitsumik eqqorneqarpoq, tamanna Dansk Tipstjenestiusimasumut, maanna Dansk Spil-imik taaguutilimmut, sunniuteqanngitsuunngilaq.
Tour de Francemi sunniuteqarluartartut ilaat, Ivan Basso aamma Jan Ullrich, qasunaveersaatinik atuisimasutut pasineqarlutik ingerlaannartumik ullaap tungaa tunuartinneqarput.
Dansk Spil-imi paasissutissiisartoq, Thomas Rørsig, oqaluttuarpoq, Tour de Francertoqarnerani inernernik eqqoriaanissamut tunngasut allannguuteqangaatsiartariaqartut, spil-itai matugallarlugit.
- Qanoq pisoqarnissaa utaqqimaartariaqarparput, eqqissisoqassappat, kikkullu sikkilernersuarmi peqataanissaat paasigutsigu, spil-inik pisinissaq ammaqqikkumaarparput, Rørsig oqarpoq.
Ivan Bassomut Jan Ullrichimullu aningaasartuuteqarsimasut Rørsigip ernumaqqunngilai, susoqassappat aningaasat tamaasa utertikkumaarmatigik.