Aningaasanoortartunut nutaarsiassatsialak

Nittartakkatigut aningaasanoorsinnaaneq inatsisitigut akuerisaq ukiortaamiit Kalaalit Nunaanni ammaanneqarpoq.
septembarip 20-at 2011 15:48

Nittartakkatigut aningaasanoortarfiit akiliisitsillutillu eqquiniaasitsisarfiit Nunatta Danmarkillu avataaneersut, Nunatsinni eqquiniaasitsisarnissaminnut ukiumit nutaamit periarfissaqalissapput, EU-kommissionimmi Danmarkimi aningaasanoortarfiit ullumi avammut ammaammagit.

Lars Henry Nielsen, Danmarkimi Akileraartarnermi ministeeriaqarfimmi allaffimmi pisortaq, Politikenimi ullumi naliliivoq, EU-kommissionip ammaassinerata kingorna, Danmarkimi Danske Spilip kisermaassisuunera ukiortaamiit atorunnaarsinnaasoq.

Taamaalilluni nittartakkatigut aningaasanoortarfiit akiliisitsillutillu eqquiniaasitsisartut, qallunaat oqartussaasuinit Nunatsinni tuniniaanissaminnut akuerineqarsimagunik, Nunatsinni aningaasanoortartunut nittartakkatigut pokerinik, kasinonik imaluunniit pisussat assigiinngitsut inernissaannik siumut eqquiniaasitsisarnissaminnut januaarip aallaqqaataani 2012-imit periarfissaqalissapput.

Nittartakkat atorlugit ukiuni arlaqartuni aningaasanoorsinnaaneq periarfissaasimavoq - aamma Kalaallit Nunaanni - taamaattorli aningaasanoornerit inatsisinik unioqqutitsisuusarsimapput. Maanna aningaasanoornerit inatsisaatsuliornerujunnaassapput kikkut qinnuteqarsimanersut kiisalu neqeerooruteqarsinnaanermut akuersissummik peqarnersut apeqqutaatillugit. Nittartakkat akuersissuteqanngikkunik inatsit nutaaq malillugu matuneqarsinnaapput.

Taamaattorli lottomik kiliortuillunilu eqquiniaanerit Danmarkimi Kalaallillu Nunaanni suli Danske Spilimit kisermaassisumik tigummineqarallassapput.

Avataaniit aningaasanoortitsisartunik Danmarkimut Nunatsinnullu ammaassinissaq siornali akuerineqaraluarpoq, 2011-mi januaarip aallaqqaataaniit atuuttussanngorlugu.

EU-kommissionimut maalaartoqarnerata kingorna, ammaassinissaq kinguartinneqarpoq. Maalaarnerli tassa tunngavissaqanngitsoq EU-kommissioni ullumi aalajangiivoq. Taamaalilluni nittartakkatigut aningaasanoortarfiit akiliisitsillutillu eqquiniaasitsisartut Nunatsinni eqquiniaasitsisarnissaminnut ukiortaamiit periarfissaqalissapput.