Aningaasanoortarneq inuit 13 procentiisa ajornartorsiutigilersinnaavaat

Bingorneq, lottorneq aningaasannanniutillu sukisaarsaataalluartarput. Innuttanulli amerlasuunut pinnguarumatuneq ingasappallaalertarpoq. Nunatta kitaani innuttat 13 procentiisa aningaasanoorutinut pinnguarneq ajornartorsiutigereersimanngikkunikku ajornartorsiutigilernissaannut aarlerinartumiittut nunatsinni misissuinerup nutaap takutippaa. Peqqissaanermi ilinniarfinni ph.d-mut ilinniartup Christina Viskum Lytken Larsenip maani nunatsinni aningaasanoorluni pinnguaatit atorneqarneri maanna misissorpai

- Maanna misissuinermi maani nunatsinni aningaasanoorluni pinnguaatinut ajornartorsiulersinnaasut ajornartorsioreersulluunniit 13 procentip missaaniittut takusinnaavarput .

13 procentit taakku maannamut inerniugallarput, Christina Larsenillu misissuinera suli naammassinngimmat erseqqissarneqassaaq. Taamaattorli 13 procentit eqqarsaammernarput, tassami aningaasanoornermik pinnguaatinut uerinikut ilaqutai aamma eqqugaasarput, aningaasanoortut kisimik pinnatik.

- Ilaqutariit aningaasanoortumik pinnguarnermik ilallit tamarmik eqqugaasarput, 13 procentillu taakku ilaqutaat amerlaqaat.

Christina Larsenip ilinniarnerminut atatillugu misissuinera nuna tamakkerlugu misissuinersuarmut ilaatinneqarpoq misissuinersuarlu 2005-imiit 2008-mut ingerlanneqarpoq, aningaasanoorlunilu pinnguarneq misissorneqassasoq aalajangiunneqarpoq, innuttat amerlavallaat bingornermut peqataalluartarnerat aalajangernermut tunngaviuvoq, Christina Larsenillu misissuinerata takutippaa bingo nuannarineqarnersaasoq, tulliullutik aningaasanoorluni pinnguaatit, lottorneq, nallukattarneq immeraannerlu.

- Sulinissap aallunissaa ajornakusuulertarpoq meeqqallu iluamik isumaginissaat ajornarsisarluni tassali aningaasanoorluni pinnguaqqinnissaq eqqarsaatigisarnermik. Aningaasanik annaasaqanngikkaagamik ilaquttami ilaginissaat annaasaqarfigisarpaat.

Aningaasanoorluni pinnguartartup qanoq ittuunera apeqqutigineqarmat Christina Larsenip oqaatigaa inuit assigiinnginnamik tamanna ingerlaannaq takuneqarsinnaanngitsoq, ajornartorsiortullu amerlanerit inuusunnerupput, angutit amerlanerullutik, inuillu angerlarsimaffimminni imigassamik ajornartorsiuteqarfinngaanneersuut aningaasanoorutinik pinnguarumatunerusarput.

Inuit peqqissusaat isiginiartillugu aningaasanoorluni pinnguarnerit katsorsaavigiginissaat anguniarlugu imigassamik ajornartorsiuteqarnertulli isigineqarnissaa Christina Larsenip neriuutigaa.

Christina Viskum Lytken Larsenip misissuinera ukiut marluk qaangiuppata naammassivissaaq. Yellowknifemi Canadamiittumi qaammatip aallartilaarnerani Christina Larsen nunatsinni aningaasanoorluni pinnguaatinik misissuinini nersornaatissussutigaa.

Nersornaat Jens Peder Hart Hansen Memorial Fundimit tunniunneqartarpoq.

Tusarnaartartusi aningaasanoortarneq pillugu misilittagaqarussi, taava uunga saaffigisinnaavatsigut radioavis@knr.gl

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat