Aningaasanoorajuttut katsorsartittut ikippallaarput

Aningaasanoorajuttunik katsorsaaneq Qaqiffiup Ilulissani Nuummilu katsorsaaviini ukiuni aqqaneq-marlunni misilittagaqarfigineqarpoq.

- Ilulissani aningasanoorajuttut ukiumut pingasut sisamat katsorsartarpagut, Nuummilu tallimat katsorsarneqartarlutik. Aningaasanoorajuttup ajornartorsiuteqarnini nammineerluni takujuminaatsittupilussuusarpaa, taamaammallu ilaqutaasut katsorsarteqqusillutik kaammattuisuusarput. Inuit imerajuttuuneq pillugu karsorsaleraangatsigit, kingusiinnakkut paasisarparput, aamma aningaasanoorajuttuusut, Inge Rahbæk Holm oqarpoq.

Nuummi Katsorsaavimmeersoq, Aqqalukasik Olsen aamma isumaqarpoq, aningaasanoorajuttut katsorsarneqartut ikippallaartut.

Inge Rahbæk Holm nangilluni oqaluttuarpoq, aningaasanoorajuttut imerajuttullu ataatsikkoorussamik ajornartorsiuteqakkajuttuusut. Tassalu arlariinnik ajornartorsiuteqartarput, aappaa misinnarnerulluni.

Kisianni ajornartorsiumminnik nassueruteqartut amerliartortut, katsorsaasup unnersiutigaa.

- Takusinnaavarput, katsorsartittut inuusuttuuneruleriartortut. Tassa imerajuttut aningaasanoorajuttullu pitsaanerusumik inuuneqalerusuttut amerliartorput.

Inge Rahbæk Holmip neriorsuutigisinnaanngilaa, Minnesotami katsorsaariaatsimik peqqissivittoqarsinnaasoq, unnerlugulu allamik periaaseqarlutik katsorsaasut aamma tamatuminnga qulakkeerinnissinnaanngitsut, inuup katsorsarneqarnissamut piareersimassusia apeqqutaalluinnartarmat.

- Aningaasanoorajuttut tamarmik assigiissutigaat, misigissutsimikkut eqqortiasuugamik aammalu imminnut tatigiuminaatsitsisuullutik. Taavalu meeraanerminni misigissutsimikkut sumiginnagaasimasuusarput, allallu ima nukatsitaatigisimasarlutik, namminneq allallu misigissusaat paasiuminaatsittarlugit. Tassalu qanoq poqertigigaluarunilluunniit, inuusuttunnguutillutilli misigissusaat uninnikuusarput., Inge Rahbæk Holm oqarpoq.

Taanna isumaqarpoq, aningaasanoorajuttut politikkikkut eqqumaffigineqaleriartortut. Isumaqarporlu, meeqqat kaattut eqqumaffigineqalernerat tamatumunnga peqqutaasoq.

- Meeqqat ajunnginnerusumik atugaqalissappata, angajoqqat saanneqartariaqarput, Inge Rahbæk Holm oqarpoq.