Assi: Google Streetview

Kalaallit Illuutaat: Aningaasanik tunniussisoqannginnissaa ilisimatitsissutigineqanngilaq

Danmarkimi Isumaginninnermut aqutsisoqarfiup satspuljemit aningaasanik tunniussisarnerminik oktobarimi unitsitsigallarneranik Kalaallit Illuutaat Danmarkimiittut ilisimatinneqarsimanngillat. Aningaasalli tunniunneqanngitsut innuttaasunut kalaallinut kingunerlutsitsissanngikkallarput.

Danskit isumaginninnermut ministeriata Mai Mercadop (V) sulisup ukiut arlallit ingerlanerini 111 millionit koruuninik tilligartarsimaneranik sapaatit akunnerata siuliani nalunaaruteqarnerata kingorna, naalagaaffiup satspuljemit aningaasaliissutigisartagaanik tunniussisarneq Isumaginninnermut aqutsisoqarfiup unitsikkallarpaa.

Danmarkimi Kalaallit Illuutaanni pisortat tamanna maanna paasisimalerpaat.

AAMMA ATUARUK Kalaallit Illuutaat satspuljet unitsikkallarneqarnerannit eqqugaasut

Aningaasammi oktobarimi tunniunneqartussat Kalaallit Illuutaannut suli tunniunneqanngillat. Aningaasat pineqartut suliniutinut arlalinnut atorneqartarput, ilaatigut innuttaasut kalaallit Danmarkimut tikeqqammersut sullinneqarnerinut, naalagaaffiup satspuljeanit Kalaallit Illuutaannut aningaasaliiffigineqartartunut.

- Isumaginninnermut aqutsisoqarfimmi peqquserluttoqarsimaneranik suliaq ima ilungersunartigivoq, tapiissutinik tunniussisarneq aqutsisoqarfiup unitsikkallartariaqarlugu, Mai Mercado TV2-mut ataasinngormat taama oqarpoq.

København: 300.000 koruunit sinnerlugit suli tunniunneqanngitsut

Kalaallit Illuutaanni Københavnimiittumi aningaasat oktobarimi tunniunneqartussat tapersersorteqartitsinermut "Ilik"-mut, ornittakkamut "Qiperoq"-mut kiisalu ingerlatsinermut nalinginnaasumut atugassaapput. 

Aningaasallu katillugit 300.416 koruunit pineqartut, Kalaallit Illuutaanni Københavnimiittumi pisortaq, Leise Johnsen, KNR-imut ilisimatitsivoq.

Isumaginninnermut aqutsisoqarfimmit aningaasat tunniunneqarsimannginnerat Kalaallit Illuutaata aningaasaqarnermut immikkoortortaqarfianit oktobarip aallartinnerani paaasineqarpoq. Aningaasalli tunniunneqarnissaat kinguaattoorutigineqaannarnersoq utaqqimaarniarlugu aalajangertoqarpoq.

AAMMA ATUARUK Aarhusimi kalaallinut ikiortarialinnut suliniut nutaaq

- Isumaginninnermut aqutsisoqarfimmit tusagaqanngilagut. Tusagaqanngivippugut, Leise Johnsen KNR-imut oqarpoq.

Leise Johnsenilli Kalaallit Illuutaannut tapiissutit amigaatigineqartut suliniutinut atuisunullu kingunerlutsitsissannginnerarpai, oqaatigaluguli:

- Tapiissutit tunniunneqarnissaat qaammatini arlalinni utaqqisinneqassanngilaq. Qujanartumilli allanit aningaasaliiffigineqartarpugut.

Pisortaq: Satspuljemik aaqqissuussinerup siunissaa ernumanartortaqarpoq

Kalaallit Illuutaanni Odensemiittumi aningaasat oktobarimi tunniunneqartussat Odensep Vejlellu kommunii suleqatigalugit "Ikaarsariarnermut suliniutinut" atugassiaapput. Innuttaasut kalaallit Danmarkimut tikeqqammersut sullinneqartarneri aamma kalaallit tikeqqammersut sapaatit akunnikkuutaartumik suliniummi "Tumi"-mi ataatsimiisinneqartarnerat suliniutitigut tapersersorneqarput.

AAMMA ATUARUK Ataatsimoortumik tapiissutit avaqqunneqarput

Suliniutillu taakku pingasut, toqqaannartumik toqqaannanngikkaluartumillu, ukiumut 2,4 millionit koruuninik aningaasaliiffigineqartartut, Kalaallit Illuutaanni Odensemiittumi pisortaq, Kirsten Mærsk, ilisimatitsivoq.

Isumaginninnermulli aqutsisoqarfiup peqquserluttoqarnerata kingunerisaanik aningaasanik tunniussisarnermik unitsitsigallarnera paasisinnaanerarpaa.

- Isumaqarpunga piffissaagallartillugu iliuuseqarnerusoq, taamaalillutimmi aaqqissuussineq misissorsinnaavaat, Kirsten Mærsk oqarpoq.

Suliniutit pineqartut aningaasaliiffigineqaratik ingerlaannarallassapput. Isumaginninnermulli aqutsisoqarfimmi peqquserluttuliortoqarnera pissutigalugu satspuljemik aaqqissuussinermut tamarmiusumut siunissami qanoq kinguneqarsinnaanera pisortap ernumanartoqartippaa.

- Suliniutitta ilarpassui satspuljemit tapiissutit atorlugit ingerlanneqarput. Taamaammat matumani pisoq pissutigalugu aaqqissuussineq politikerinit allanngortinneqassappat sunniuteqarsinnaavoq, Kirsten Mærsk oqarpoq.

AAMMA ATUARUK Satspuljemidler er ikke indireke bloktilskud

Kalaallit Illuutaannut Aarhusimiittumut aningaasat tunniunneqartussat 200.000 koruunit missaanniittut, pisortap Jørn Holbechip oqaatigaa. Aningaasallu taakku ilaatigut isumaginninnikkut suliniummut "Kammak"-mut atorneqartussaapput.

Kalaallit Illuutaannit Aalborgimiittumit oqaaaseqartitsisisinnaasimanngilagut.

Aamma Namminersorlutik Oqartussat ataanni meeqqat inuusuttullu sullinneqartarnerinut suliassaqarfimmit katillugit 10 millionit koruunit tungaannut tapiiffigineqarnissamik qinnuteqaateqarsinnaaneq 2017-imit 2020-mut periarfissaavoq. Isumaginninnermulli aqutsisoqarfiup aningaasanik tunniussiunnaarallarneranik Namminersorlutik Oqartussat eqqugaanngitsut, Isumaginninnermut naalakkersuisoqarfik KNR-imut ilisimatitsivoq.

AAMMA ATUARUK Hammondip Chemnitzillu aningaasanut inatsisissamut kissaatitik saqqummiukkaat

 

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat