Aningaasanik taarsigassarsisinnaaneq Sermersuumi misissorneqarpoq
Borgmester Asii Chemnitz Narupip aningaaserivik Andelskasse Oikos, nunanut piitsoqarfinniittunut imminut ikiorsinnaalernissaq siunertaralugu aningaasanik taarsigassarsititsisartuusoq, decembarip qaammataani ataatsimeeqatigaa.
Taarsigassarsisitsisarnermi periutsit sorpiaanersut ataatsimiinnermi qulaajarneqartut ilaatigut taarsigassarsiat suunerinik, iluatsissappatalu suut eqqarsaatigineqartariaqarnerannik, aamma taarsigassarsisitsisoqannginnerani qulakkiigassat arlalissuit, nassuiaatigineqarput.
Inuussutissarsiornermut naalakkersuisup, Ove Karl Berthelsenip, mikrolån soqutiginartillugu siorna saqqummiuppaa.
Kommuneqarfik Sermersuumi illoqarfinni nunaqarfinnilu assigiinngitsuni taarsigassarsisinnaanissaq atorneqarsinnaassappat tamakkunani sukumiisumik misissuisoqaqqaartariaqarpoq. Tamatuma kingorna aningaasanik attartorluni sumiiffinni toqqakkani suliniuteeqqanik aallartitsisoqarsinnaalissasoq, Kommuneqarfik Sermersuup nittartagaani allaaserineqarpoq.
