Aningaasanik taarsigassarsiniartarfik Dan-Aktiv nunatsinni iluareqqusaarluni uukapaatitsiuannguarpoq.
Innuttaasut arlalippaaluit piffissami matumani allakkanik nakkartitsisarfitsigut aningaasanik taarsigassarsinissamut neqeroorutitsialaarpasiivissumik pajunneqallattaapput.
Atuisulli siunnersuisooqatigiivi atorniarniartunut mianersoqqussuteqarput.
- Taamaattumik allagarsisimaguit ajornanngippat siittorlugu ikuallanniaruk, taamaanngippat eqqaavimmut iginniaruk!
Inatsisileritooq Mark Larsen taama siunnersuivoq.
Aningaasanik taarsigassarsinissamut neqeroorut piumasaqaatitaqanngilaq inerteqqutaananilu.
- Imaassinnaavoq siornatigut akilersugassamik pisereersimasutit taamaalillutit neqeroorummik taamaattumik pajutsillutit, tassa taarsigassarsiniarnissamik neqeroorutaannaagaluarpoq taamaattorlu neqeroorutinut Brugsenikkunnit pisartakkatsinnit allaanerulluinnarpoq.
Mark Larsen nassuiaavoq.
- Inummut aaliangersimasumut nassiunneqartarpoq taamaaliornerlu Direct Marketingimik taaneqartartoq inerteqqutaanngilaq.
Taarsigassarsisumullu naggataatigut akisoorujussuanngortussaavoq erniat qaffasissorujussuummata.
Dan-Aktivip nittartagaani takuneqarsinnaavoq taarsigassarsiat nalingisa affai sinnerlugit erniaqartussaasut.