Aningaasanik peqquserluuteqarsimasutut unnerluunneqartussanngorpoq
Tusarfiit tutsuiginartut naapertorlugit Karl Davidsenip Maniitsup Tusaataata karsianiit aningaasanik tigusisarsimasutut pasineqarnera soraarsinneqarneranut peqqutaavoq.Taamaattoqarnera Karl Davidsenip ilumuunngilluinnarnerarpaa.
Maniitsup Tusaataata, Akisuasup, aningaasatigut ajornartorsiorneq peqqutaalluni ingerlaannarsinnaanera nalorninarsimasoq, Akisuasumi aqutsisunngortup Jensine Berthelsenip sapaatip akunnera kingulleq oqaatigaa.
Tusarfiillu tutsuiginartut naapertorlugit Akisuasumi aqutsisuusimasoq kommunalbestyrelsimilu ilaasortaq Karl Davidsen apriilimi soraarsitaavoq.
Pineqartup aningaasanik atornerluisimanermut tunngatillugu tusakkat ilumuunngilluinnarnerarpai.
- Karsiminngaanniit ataatsimilluunniit tigusisoqarnikuunngilaq, taamaattoqarnikuunngilluinnarpoq, kisianni annerusumik oqaaseqarfigerusunngilara, Karl Davidsen oqarpoq.
Maniitsumi Akisuasup aningaasaqarniarnera sooq taama ajortigilersimanersoq ima nassuiarpaa:
- Illoqarfimmi aningaasarsiornerup pitsaavallaannginnera peqqutaalluni suliffeqarfiit eqqugaasut arlalissuupput, taakkununngalu ilaavoq Akisuasoq, taamaattumik imaaliallaannaq nammineq iluarsisinnaanngisatsinnik Akisuasumi ukiuni arlalinngortuni aningaasatigut ajornartorsiorpugut, Karl Davidsen oqarpoq.
Taanna kommunalbestyrelsimi aallaqqaammut Atassut kingusinnerusukkullu Siumut sinnerlugu 2002-mili ilaasortaavoq, juulilli aallaqqaataaniit tunuarniuteqarnini ilaquttanilu Nuummut nuunniarnerminnik peqquteqarnerarpaa:
Akisuasumiit soraarsitaavit?
- Taanna massakkut oqaaseqarfigerusunngilara.
Tutsiuginartunit paasisavut malillugit aningaasanik karsimiit tigusisarsimasutut politiinut unnerluunneqassaatit, tamanna qanoq oqaaseqarfigisinnaaviuk?
- Karsiminngaanniit ataatsimilluunniit tigusisoqarnikuunngilaq Karl Davidsen oqarpoq.
Akisuasumi pissutsit arlaqartut aaqqeqqullugit peqquneqarsimalluni Karl Davidsenip oqaatigaa, taanna massakkut uppernarsaatissanik piumasaqarsimavoq soorlu aamma eqqartuussisuserisumit siunnersorneqarsimalluni oqaatigalugu.
Akisuasup siulersuisuinit aqutsisortaavaniillu oqaaseqartitsiniaraluaratta iluatsinngilarput.