Aningaasanik nunatsinnit imaaliallaannaq annissuisoqarsinnaajunnaassaaq

Taakkuupput danskit aningaasarsiornikkut aamma suliffissuaqarnikkut ministeriata, Lene Espersenip ullumi Folketingimi inatsisissatut siunnersuutai.

Inatsisissatut siunnersuutip siunertaaraa, peqqussutip EU-mi atuuttup Kalaallit Nunaanni atuuttuulersinneqarnissaa. Tassalu aningaaserivitsigut aningaasanik nuussinermi inummut paasissutissat tamarmik allattorneqartalissasut.

- Kissaatigineqarsimavoq peqqussutip EU-mi atuuttup Kalaallit Nunaanni atuuttuulersinneqarnissaa. Tamannalu Namminersortut Oqartussanut tusarniaavigineqarsimavoq, taakkulu siunnersuummut immikkut oqaaseqaateqarsimanngillat, nalunaarlutilli siunnersuut pitsaasuusoq, oqarlutik pinerlunnikkut aningaasanik isertitanik malunnarunnaarsaanermi Kalaallit Nunaat aqqutigineqartassanngitsoq, taama Lene Espersen oqarpoq.

Inatsisissatut siunnersuutip piumasaqaatigaa, aningaaserivitsigut Kalaallit Nunaanniit aamma Kalaallit Nunaannut aningaasanik nuussinermi, atit, adressit aamma inuup normui erseqqissumik allanneqartarnissaannik. Tamanna Kalaallit Nunaanni qanoq atuuttuutinneqalissava?

-Aningaaserivinnik nakkutilliisut aammalu politiit suleriaasii iluaqutigalugit inatsit atuuttuutinneqassaaq. Tamannalu Kalaallit Nunaanni ajunngitsumik misilittagarineqareerpoq. Taamaattumik inatsisip atuuttuutinnissaa Kalaallit Nunaata sapinngikka nalunngilara, danskit aningaasarsiornikkut aamma suliffissuaqarnikkut ministeria, Lene Espersen akivoq.

Inatsisissatut siunnersuut Ataatsimiissitaliarsuarmiit akuerineqareerpat, juunip aallaqqaataanit 2010-mi inatsit atuuttuulersinneqassaaq.

Grønlandsbanki nalunaarpoq, inatsisip atuutilernissaanut piareersimallutik.