Aningaasanik isaatitsivik Vittusip aqukkusuppaa
Assartuussinermi akit qaffapput, taakkuali qaffakkiartunnginnissaannut aningaasaqarnermut naalakkersuisoq Vittus Qujaukitsoq, pilersaaruteqarpoq. Tassami ikummatissat akikinnerulersinniarpai, erseqqissarlugulu isumaqarami, Polaroil aningaasanik KNI-mut nuussisinnaaniassagami akisutitsisoq. Taamaammat aaqqiinissaq pisariunngilaq.
-Misissorneqartariaqarpoq, ilumut akit appasinerusut pissarsiarineqarsinnaanersut, Polaroili kisimiitillugu inissisimalissagaluarpat, inuiaqatigiinni akit qaffakkiartuinnassanngippata, Vittus Qujaukitsoq oqarpoq.
Taassumali erseqqissarpaa, taamaaliornissaq nammineq siunnersuutigigamiuk, aammali misissuinissaq Naalakkersuisunut isumatusaarnerussasoq isumaqarfigalugu. Maannakutummi itsillugu Vittus Qujaukitsoq qularutiginngilaa, KNI-p piginneqatigiiffissuup sinnerani atugassanik PolarOil aningaasaajaraa.
- Qulaajaasariaqarpugut, inuiaqatigiinnut akikinnerpaamik aaqqissuutissat ujartorlugit.
Tassalu illit paasinninnerit naapertorlugu, akit qaffattarput, KNI-mut atanera peqqutaarpiarluni?
- Tassa taanna pasitsaanneqarsinnaavoq, Vittus Qujaukitsoq oqarpoq.
Tassalu taamaalilluni KNI-p ingerlanneranut Polaroil akileeqataasarnera ikummatissanut akitsorsaataasoq, naalakkersuisoq isumaqarpoq.
Vittus Qujaukitsullu qularutiginngilluinnarpaa, ikummatissanut akit iliuuseqarfigineqartariaqartut, taakkuamki qaffakkaluttuinnarneri inuiaqatigiinnut pitsaanngitsumik sunniuteqartartut.
Ikummatissami akiisa qaffasinneri arlalitsigut akitsorsaataavoq.
Nioqqutissanut assartuinermut, angallannermut, kiassarnermut, innaallagissamut, imermut - sunut tamanut kalluaasumik ikummatissat akiisa qaffakkiartuinnarnerat inuiaqatigiit akisunerusumik inuuniarnerannut malitseqarpoq, Vittus Qujaukitsoq oqarpoq.
KNR-imiit Polaroilimi pisortaaq maannalu KNI-mi pisortaanerugallartoq Peter Grønvold Samuelsen aamma attaveqarfigaarput, taannali matumunnga oqaaseqarumanngilaq.
Polaroil ukiuni kingullerni marlunni sinneqartooruteqartarpoq, ukiup siuliani 73 mio. Kr.-nit taavalu 80 mio. Kr.-nit . Aningaasat taakkua KNI-p tamakkiisumik naatsorsuutaanut ingerlateqqinneqarput, Namminersorlutik Oqartussat piginneqatigiiffiutaat taamaalilluni sinneqartooruteqarluarluni.
Polaroil KNI-ip ataaniinngikkaluarpat, KNI siorna 34 mio. Kr.-nik amigartooruteqassagaluarpoq. Taamaassimassagaluarpat pigineqatigiiffimmik kisimiillutik piginnittut - Namminersorlutik Oqartussat – naammaginnissimassanngikkaluarput.
