Aningaasanik agguaasoq politiilersuunneqartoq
Robin Hoodimut Nanortalimmeersumut assingusumik Tysklandimi illoqarfimmi Aschaffenburgimi aningaasanik agguaasoqarpoq. Angut utoqqasaaq aningaasanik euronik aqqusinermi naapitaminut tunnioraasoq eqqumiigalugu politiinut nalunaarutigineqarpoq.
Allattoq Jaaku Lyberth
septembarip 02-at 2010 10:53
Angut aningaasanik euronik agguaasoq kavaajamini allagartaliisimavoq, allassimasunik: "Angerlarsimaffeqanngitsuunngilanga, aamma sulifissaaleqisuunngilanga, nuliaqarpunga angerlarsimaffeqarpunga ajunngilangalu, taamaattumik euromik ataatsimik tuniniarpakkit".
Tysklandimi illoqarfimmi Aschaffenburgimi angut aningaasamik euromik ataatsimik aqqusinermi agguaasoq niaqulaalersimanasoralugu innuttaasut politiinut nalunaarutigigaluarpaat, politiilli qanoq iliuuseqanngillat.
Angutip taassuma politiit oqaluttuuppai soraarninngornini nuannaarutigalugu inunnik allanik avitseqateqarniarluni aningaasanik agguaasimalluni.
