Aningaasaliisussat assortuussutaapput

Allattoq Mads Lynge
oktobarip 16-at 2006 07:17

Canada-mi senatip illersornissamut ataatsimiititaliaa Nunavumi ineriartornermut akornutaaginnalerunarpoq.

Nunavumi sakkutooqarfiliortoqarniaraluarpoq, kikkulli aningaasaliisuussanersut ataatsimiititaliami assortuussutaavoq Nunatsiaq News allaaserinnippoq.

Canadami naalakkersuisut oqarput Canada-p issittortaani sakkutooqarfiliornissaq illersornissamut ministereqarfiup akiligassarigaa, illersornissamulli ataatsimiititaliamit oqaatigineqarpoq umiarsualivinnut oqartussat aningaasaliisuussasut.

Sikunik aserorterutit nutaat kikkunnit akililerneqassanersut assortuussutaavoq. Canada-p sineriaanik nakkutilliisut sikunik aserorterutinik ingerlatsisuupput, nutaanillu pingasunik pisisoqarnissaa Canada-p illersornissamut ministeriata Gordon O’Connor-ip siunnersuutigaa. Canadamili senatorit siunnersuummut tapersersuinngillat.

Canadami naalakkersuisut Canadap issittortaanik piginnittussaanertik pingaartittorujussuuaat, tamaanilu sakkutuuliinissartik pilersaarutigalugu.