Aningaasaliissutit pisariaqartitanut atorluarneqassapput

juunip 06-at 2005 10:10

Meeqqanut sumiginnakkanut paaqqinniffittaaq Qaqortumiittoq ”Illu Paarsivik” Lions Clubimit 250.000 koruuninik tapiiffigineqarpoq, aningaasallu illumut sukisaarsaarnissamullu atorneqassasut, meeqqerisumut ikiorti Karen Knudsen oqarpoq.

- Aningaasat illumut atortussanut, pinnguaatinut, oqorutinut siniffinnullu atorneqassapput. Aamma angalaassagaangatta inuusuttuaqqallu pisariaqartitaannullu atorneqassapput. Nuanneqaaq tuppallernaqalunilu aningaasanik tunineqarluni. Karen Knudsen nassuiaavoq.

Illu Paarsivik maajip 18-iani atoqqaartinneqarpoq, sulisullu katillugit tallimaapput. Illu Paarsivik inuusuttuaqqanut sumiginnakkanut 14-init 17-inut ukiulinnut arfineq-pingasunut inissaqarpoq, Qaqortuminngaanneersuunngitsunullu naatsorsuussaavoq.

- Anguniagaavoq, inuusuttuaqqat inuiaqatigiinni inooqqilernissaannut ilinniaqqinnissaannullu ikiorsiinissaq siunnersuinissarlu. Inuusuttuaqqat maaniittut Qaqortuminngaanneersuunnginnissaannut pissutaavoq, ilaquttatik ikinngutitillu illoqarfeqatigissagunikkit sullinniarneri oqimaannerusinnaammata, ilaquttaminnut ikinngutiminnullu orniguteqqajaanerusinnaallutik. Taamaattumik illoqarfimmut allamut pillutik inuuneq allamut saatilaarlugu sukisaarsarniarlugillu tamaanngartittarpavut. Karen Knudsen oqarpoq.

Lions Clubip tapiissutai 250.000 koruunit prins Henrik-up Fredensborg Slot-imi aqaguagu tunniutissavai, Illu Paarsivillu sinnerlugu tigusisuussapput håndboldertartoq nunanut allanut unammisartoq Hans Peter Kyed aamma erinarsortartoq Julie Berthelsen.

- Pisortarput piffissaqarpianngimmat Hans Peter Kyed aamma Julie Berthelsen tigusisussatut toqqarneqarput. Aammali Julie Berthelsenip nunatsinnut sinniisuulluartuummat matumani tigusisussanngortinneqarneranut pissutaaqataavoq. Karen Knudsen erseqqissaavoq.

Illu Paarsivik Qaqortup Kommuneata atukkiussaraa, Qaqortumilu innuttaasut namminersortullu tapersersuillutik aningaasaliissuteqartut saniatigut aningaasaateqarfiit arlallit soorlu Nunafonden 150.000 koruuninik aamma tapiissuteqarsimavoq.