Aningaasaliissutit agguataarnerat isumaqatigiinngissutaavoq
Aningaasalli agguataarnissaannut pilersaarummut Kommuneqarfik Sermersuup borgmesteria Asii Chemnitz Narup pakatsivoq, taakkunani takuneqarsinnaammat Kommuneqarfik Sermersuumut aningaasaliissutissat 39,1 million koruunit akornanni Nuuk 13 million koruuninik tunineqassasoq.
-Allatut oqarsinnaanngilanga suli tupigusuttuarsinnarama Naalakkersuisut isumaqarpasimmata akikinnerusumik suliffissaaleqinermik akiuiniarsinnaasugut, Asii Chemnitz Narup oqarpoq.
Aningaasaliissutit agguaqatigiissikkaanni Kommuneqarfik Sermersuumi suliffissaaleqisumut ataatsimut 27.000 koruunit atugassiissutigineqarput, kommuuninut allanut sanilliussigaanni assersuutigalugu Kommuni Kujallermi qaffasinnerupput, tassani suliffissaaleqisumut ataatsimut 44.000 koruuniussammata. Asii Chemnitz Narup isumaqarpoq aningaasaliissutit nikingavallaarujussuartut.
-Maani Nuummi suliffissaaleqisut marsip naanerani 990-iupput, aperisariaqarpunga taakku sooq kommuneni allani allani suliffissaaleqisunut naleqqiullugit pitsaannginnerusumik ikiorserneqassanersut?
Asii Chemnitz Narupip erseqqissaatigaa pissutsit taamaakkaluartut Nuummi suliffissaaleqisut ikilisinniarlugit namminneq sulinertik ingerlaannassasoq, ilaatigullu taavaa kommunalbestyrelsip suliffissaqartitsiniarnermi nalerassatut qulit siorna ataatsimiinnerminni aalajangersorsimagai. Uanili Naalakkersuisut aningaasaliissuteqarneranut tunngasut Ilulissani ataatsimiinnissami ilanngullugu taassamaarnerarpaa.
Nuup illoqarfianut aningaasaliissutit allanut naleqqiullugit ikinnerunerat nassuiaatissartaqartoq Inuussutissarsiornermut Naalakkersuisoq Jens-Erik Kirkegaard oqarpoq, Naalakkersuisullu naliliiniarnerminni Kommuneqarfik Sermersuup siorna 111 million koruuninik sanaartugassanut aningaasaateqarnera isiginiarsimanerarpaat, aningaasaliissutit taakku Kommuneqarfik Sermersuup suli atorsimanngilai.
-Piviusunngortitsisinnaaneq kommuunip aamma isiginiartariaqarpaa. Pioreersut 111 million koruunit sulisinniarligit, taamaalillutik aamma Nuummi innuttaasunut iluaqutinngorsinnaaniassammata. Nuuk ukioq manna 200 million koruunit tungaannut aamma aningaasaliiffigineqareerpoq, siorna aningaasaliissutit ilanngukkaanni maannamut 300 million koruunit aningaasaliissutigineqareerput, Jens-Erik Kirkegaard erseqqissaavoq.
