Aningaasaliisoqarnerunissaa ujartorpaa
Tuluit nunaata angeqataa, tassaavoq Upernavimmi nakkutilliisut nakkutiginiagassaat Vilma isikkanik 19-ninik angissusilik angallatigalugu.
- Taamaattumik ukiumut missingersuutit 8 million koruunit ikippallaarput, Niels Laursen, Radioaviisimut oqarpoq. Nangilluni oqaatigaa, nakkutilliineq tamakkiinerusumik ingerlanneqassappat aningaasaliissutit 1 million koruunik amerlineqartariaqartut. Tamatumunnga ilaatigut pissutaanerarpaa orsussap akitsornera.
Orsussap akitsornera kisiat aningaasartuuteqarfiunerulersimanngilaq tassa iluarsartuussiffiusartunut aningaasartuutaasartut aamma qaffassimanerarpai, kiisalu atortussat nalinginnaasut allat.
Kangaatsiap kommuniani nakkutilliisoqarneq taamaatinneqarsimavoq Paamiullu pitsanngorsaavigineqarluni, sooq taamaaliorsimanersut apeqqutigineqarmat, Niels Laursen oqarpoq, - Taamaaliorpugut ukiuni kingullerni pingasuni missingersuutivut allanngortinneqarsimanngimmata, aappaagumullu taamaaginnassagunarlutik.
Paamiut pitsanngorsaavigineqarneranut aamma pissutaanerarpaa, Paamiut Namminersornerullutillu Oqartussat ukioq kingulleq isumaqatigiissuteqarsimammata aningaasartuutinik avitseqatigiittarnissamik. – Tamanna malugilluarsinnaavarput, Niels Laursen Radioaviisimut oqarpoq.
Nakkutilliineq tamakkiinerussappat assigiinnik angallateqarnissaq kissaatiginarnerarpaa. Maannakkut pigineqartut tassaapput Viksundit sisamat isikkanik 33-nik angissusillit aamma Vilmat isikkanik 19-ninik angisussillit sisamat pigineqarput.
- Tassa imaappoq nakkutilliisut massakkut atugaat tamakkiisungillat, Niels Laursen oqarpoq.
Assersuutitut taavaa Upernavimmi nakkutilliisut Tuluit nunaattulli angitigisoq nakkutigisassarigaat, Vilma angallatigalugu, atortutigulli isumannaannerarpaa.