Aningaasaliisartoq nutaamik isumaqatigiissusiorpoq

Isumaqatigiissut ukiut tamaasa 100.000 koruuninik timersornermut iluaqusiisassaaq.

Isumaqatigiissut aamma immikkut tapiisarnernik nassataqassaaq, soorlu aaqqissuussinernut atatillugu akeqanngitsumik timmisartorsinnaasoqassalluni. Soorlu taamaaliornikkut Team Grønlandip arpattartoq Wilson Kipketer Nunatsinnukartippaa.

- Taamaaliornikkut periarfissat Danmarkimiittut atorluarnerusinnaavavut, Team Grønlandip siulersuisuini siulittaasoq Finn Meinel oqarpoq.

Aningaasarsiornikkut ajornartorsiortoqaraluartoq, aningaasaliisartut Team Grønlandimut aningaasaliissutiminnik ikilisaanngillat:

- Maannamut tamanna suli maluginngilarput, Finn Meinel oqarpoq.

Team Grønlandimut aningaasaliisartut pingaarnerit arfineq-marluupput. Nuna Fondimut isumaqatigiissut qanittukkut nutarterneqarpoq. Piffissamilu aggersumi aningaasaliisartunut pingaarnernut arlalinnut isumaqatigiissutit nutarterneqartussaapput.