Aningaasaliisarfiit pisuussuteqannginnerarput

Akilersuinerluttut akiligassaat ukiuni kingullerni marlunni amerleriarujussuarsimapput, tamatumunngalu aningaasaliisarfiit Dan-Aktiv, Nordea Finans aamma Ikano A/S pisuussuteqannginnerarput.
januaarip 26-at 2010 11:47

Aningaasanik taarsigassarsinissaq ajornanngippallaaqaaq, taama Grønlandsbanken aamma Kreditinformation Grønland imminnut attuumassuteqaratik uparuaapput.

Aningaasaliisarfittut ingerlatseqatigiiffinni pingasuni taakkunani oqaaseqartartut arlaannaalluunniit apersorneqarusunngilaq. Nordea Finans Kalaallit Nunaanni killilerujussuarmik suliaqartarpoq akiitsullu amerleriarsimanerat nalunaarsorsinnaanngivillugu, tusagassiuinermut siunnersorti Bjarne Christiansen taama nalunaarpoq.

Ikano A/S 2008-mi qaammatini arfinilinni aningaasanik taarsigassarsisitsisareerluni Kalaallit Nunaannik sullissiunnaarpoq, taama nalunaarpoq pisortaaneq Jesper Schmidt.

- Kalaallit Nunaanni akiliisinnaassuseq nalilersinnaasimanngilarput, pissutsit Danmarkiminngarnit allaanneruallaaqimmata. Kalaaleq ataasiinnarluunniit 1 kronimik pisassaqarfiginngilarput, taama oqarpoq.

Aammattaaq Dan-Aktivimi Kalaallit Nunaanni akilersuinerluttut akiligassaasa amerleriarujussuarnerat malugineqarpoq. 2008-mi aningaasaliisarfittut ingerlatseqatigiiffiup Danmarkimi Kalaallit Nunaannilu sullitat akiliisinnaassuseqarnerat nammineq periaatsimigut sukannernerulersereerpaa, taama oqarpoq pisortaaneq Søren Kargaard.

Nota Bene Radio Dan-Aktivimik suleqateqarpoq, sukannernerulersitsinerlu malugalugu, taama oqaluttuarpoq pisortaq Karoline Frederiksen:

- Qinnuteqaatip immersornissaa ajornanngitsuararsuuvoq, kikkulli tamarmik ingerlariaqqittaratik. Aallaqqaammut qinnuteqaatit 90 procentii ingerlaqqittarput. Ullumikkut agguaqatigiissillugu 40-50 procentit akuersissuteqarfigineqartarput.

Maanna januaarimi RKI-p nalunaarsuisarfiani akilersuinerluttut akiligassaat katillutik 36,5 mio. koruuningajaapput.