Aningaasaleeriaaseq alla atorlugu iluarsartuussinissaq ornigineqarpoq
Seqernup nukinga atorlugu innaallagiatortunik, oqortorsuarnik iigalersukkanik ussissunillu igalaalersukkanik illuliorsinnaaneq periarfissiuunneqalerpoq . Illuutillit taamaalillutik kiassarnermut aningaasartuutikinnerulissapput. Qanoq iliortoqarsinnaaneranik sanaartornermi ingeniøri Jørn Hansen siunnersuuteqarpoq.
- ESCO - Energy Serving Company - Nukissiuutinik sullissisoqatigiit Danmarkimi aamma nutaajuvoq. Suliffeqarfiit assigiinngitsut suleqatigiinnermikkut illuutilimmik nutarterisariaqartumik suleqateqalersinnaapput, illup suliassartaanik isumaginnittussanngorlutik. Illuutilik akissaqanngikkuni akiliissanngilaq, kisianni sanaartortussat aningaasaliisussallu ukiuni qassini suliaq ingerlassanersoq suullu sipaarfiginiarneqarnersut pillugit isumaqatigiissusiorfigineqassapput. Suliat naammassippata, sipaarutaalersoq erniortinneqarsimassaaq naggataagullu illuutilimmut iluanaarutaalluni, Jørn Hansen nassuiaavoq.
Suliffeqarfinnik arlalinnik attaveqareerpoq.
-Bankit sanaartornermillu suliallit arlallit attavigereerpakka. Suliffeqarfiup ESCO-mi suleqataalersup avatangiisinik mingutsitsinngitsumik suliaqartuunini takoqqusaarutigisinnaavaa taamalu aamma suliffissanik pilersitseqataassalluni. Naatsorsuutigilluinnarpara suleqataarusuttoqassappat Nuummiinnaanngitsoq aammali sinerissap sinnerani nutarterinerit siunissami aallartissinnaajumaartut, soqutiginnittoqareerpormi, Jørn Hansen nassuiaavoq.
Nutaamik eqqarsarneq Aningaasaqarnermut Naalakkersuisup Palle Christiansenip tikilluaqqunartippaa.
-Sarfamik orsussanillu atuinikitsunik illulioriaaseq ESCO tusarlugu soqutiginaqaaq, taamaammat sukumiinerusunik paasissutissinneqarnissarput ammaffigaarput. Nunatsinni iluarsartuussassarpassuit eqqaaginnaraanni aningaasalersueriaaseq siunissami sipaarutissartaqarmat soqutigissaqaarput, Aningaasaqarnermut Naalakkersuisoq Palle Christiansen oqarpoq.
Paasissutissinneqariarunik Naalakkersuisuni piaartumik eqqartoqatigiissutigiumaarlugu aamma oqaatigaa.
Jørn Hansenip suliniut ESCO Katuami sisamanngorpat saqqummiutissavaa. Nukissiuutinik atuinermik sipaarnissaq Kalaallit Nunaanni Sulisitsisut Peqatigiiffiata GA-p Nukissiorfiillu Nuummi aqaguagu isumasioqatigiissitsilerunik qitiutissavaat. Qulequtaraat "Nukissiuutinik atuilluarneq - niuernikkut periarfissalik".
