Aningaasaatitit imatut aannertusaarnerusinnaavatit

Qajuusat allalu iffiornermi atortussat pisariaqartissagunarpatit. Aamma ilaqutariit nerersuarnissaannut pisiniartoqassaaq iggisissartai mininnagit. Aap, aningaasat amikkittoornarseriataarsinnaapput sipaarfiusinnaasut eqqumaffiginngikkaanni. Tamaammat Atuisunut siunnersuisoqatigiit isumassarsiorfiusinnaasunik pajuguteqarput.

- Illoqarfiit anginerit immaqa periarfissaginnerupput sipaarniutinik ujarlernermi unammilleqatigiittoqarnera pisstaalluni. Tassani ulluinnarni atugassat akii sanilliunneqarsinnaapput akikinnerlu toqqarlugu, Atuisunut siunnersuisoqatigiinni siunnersorti Looqi Svane KNR-imut oqarpoq.

- Aamma juullimut kaageeraliornissaq qaammammik ataatsimik sioqqullugu neqeroorutinik misissuisoqarsinnaavoq, tassanili eqqumaffigisariaqarpoq nioqqutip qaqugu kingusinnerpaamik atornissaata maluginiarnissaa, Looqi Svane oqarpoq.

Juullikkunni tunissutissani nuannarineqarnerit ilagisarpaat atortorissaarutit innaallagissamoortut soorlu oqarasuaatit angallattakkat. Aamma tassani illoqarfinni anginerusuni najugallit periarfissaginnerupput akikinnersiornissamut illoqarfinnut mikinernut nunaqarfinnullu sanilliullugit.

- Illoqarfinni anginerni oqarasuaat angallattagaq aalajangersimasoq pisiniarfiit arlallit pigisinnaasarpaat. Tassani akit sanilliussinnaanerat iluaqutigineqarsinnaavoq. Illoqarfinni mikinerusuni najugallit aamma Nuummi pisiniarfiit akigititaat misissuataarsinnaavaat illoqarfinni mikinerni unammillertoqannginnera pissutigalugu akisunerusinnaasarmat. Taamaammat Nuummit piffissaalluarallartillugu misissorneqarsinnaapput juullertinnagu tunissutissat tiguniassagakku, Looqi Svane oqarpoq.

Illoqarfinni anginerni unammilleqatigiinneq iluaqutaagaluartoq aamma suli sipaartoqarsinnaavoq nittartakkat aqqutigalugit Danmarkimut pisiniarnermi.

- Nassiunnera akilerneqartussaagaluartoq suli sipaartoqarsinnaasarpoq momsi ilanngaataasussaammat. Taamaammat Danmarkimi nittartakkakkut pisiniarneq suli akikinnerusinnaasarpoq, Looqi Svane oqarpoq.

Aammali iluatsitsinerliortoqarsinnaasarpoq pisiaq ajoquteqarsimagaangat. Tassani pingaaruteqarpoq nammineq pisinnaatitaaffiit ilisimaarinissaat aammalu piniarfiit taama pisoqartillugu qanoq iliorsinnaatitaanerisa ilisimanissaa.

- Naak nittartakkakkut pisiniarnikkut sipaartoqarsinnaagaluartoq ajornannginnerpaajuaannarpoq nammineq illoqarfigisami pisiniarfimmut saaffiginninnikkut pisiap ajoqutillip misissortinnissaa. Tassami pisiffigisaq siullertut saaffigineqartussaavoq pisiaq ajoquteqarsimassappat. Assersuutigalugu fjernsyn ajoquteqarsimappat Danmarkimi pisiffigisamut nassiuttariaqalersinnaavoq nittartakkakkut pisiarisimagaanni.

- Taamaammat ilinnut pitsaaneruvoq pisiniarfimmut nammineq saaffinnillutit pisiaq ajoqutilik takutikkiartorukku. Tassanilu pingaarpoq pisinnaatitaaffippit ilisimanissaat.

- Siullertut pisiniarfiup nioqqut iluarsaanniartussaavaa. Iluarsineqarsinnaanngippat taassuma assiganik assigusumilluunniit taarsertussaavaa. Aatsaat taassuma assiganik tunisinnaanngippatsit akiliutitit utertissinnaavatit, Looqi Svane oqarpoq.

Maanna tassa december aallartereerpoq. Sipaarfiusinnaasunik ujarlerluarna.

Pisinnaatitaaffitit aamma misissuataarsinnaavatit Atuisunut siunnersuisoqatigiit nittartagaanni: www.atuisoq.gl