Aningaasaatillit imaluunniit nunasiaatillit kammagissavagut?
Suleqatigilersinnaasagut aningaasaateqarluassappat imaluunniit Danmarkimut naalagaaffeqateqarneq nukittorsarneqassava?
Apeqqutit ilaatigut tamakku oqaluuserineqarnissaanut isumassarsisuupput, Københavnimi Radikale Venstret immikkoortortaqarfia, oqalliseqatissaminnillu allattoqarfimminnut, Kronprinssegade-mut Københavnimiittumut qaaqqusillutik.
- Nunarsuatta kissakkiartornera ilutigalugu, siku appaat suna tamarmi ajortuinnaassinnaanngilaq, tassami aatsaat unammilligassaqalissagatta nunarsuatta pissusaa eqqarsaatigalugu politikkeqarnissamut. Immakkut angallaffiusinnaasut nutaat pilissapput, immat nutaatut taaneqarsinnaasut nunanit marlunnit avinneqarnissaat eqqartorneqalissaaq aatsitassasiorfiusinnaasullu nutaat tikikkuminarnerulissallutik.
Kalaallit Nunaata nammineersinnaaneruleriartornera ilutigalugu aaqqiissutissanik nutaanik ujarlertoqassaaq, tamannalu Danamarkimut kanngusuusaarnartussaassalluni peqataaniarnera arriippallaamik ingerlanneqassappat. Oqallinnissamut tunngavilersuutit ilaatigut taamaattut tusarliunneqarput.
De Radikale Venstret folketingimi ilaasortaatitaat nunanullu allanut tunngasunut oqaaseqartartuat, Rasmus Helveg Petersen aamma Sara Olsvig, Inuit Ataqatigiit sinnerlugit ilaasortaq oqalliseqataassapput. Taakku saniatigut peqataassapput, Københavnip Universitetiani Sakkutooqarneq pillugu ilisimatusarnermi professori, Mikkel Vedby Rasmussen aamma nunanut allanut tunngasunut ministeriaqarfimmi inatsiseqarneq pillugu immikkoortortaqarfimmi pisortaq, Moskvamilu Danmarkip aallartitassaatut qanittukkullu atorfinittussaq, Thomas Winkler oqallitsinneqassapput.
Oqallinnissamik aaqqissuussisut taakku piareerunik tusarnaartulerlutik oqallisissapput, tamanna pissalluni Københavnip ilaani Prinsessegade-mi, pingasunngorpat januaarip 23-anni nalunaaqutaq unnukkut arfineq pingasup eqqanut.
