Aningaasaatilissuup akiliisinnaajunnaarnera sunniuteqarsinnaavoq
Nunamineralsimi aktiaatigineqartut 20 procentii Carsten Bergimit pigineqarput, Carsten Bergip suliffeqarfiutaata akiliisinnaajunnaartup akiligassai matussuserniarlugit aktiat taakku maanna tuniniarneqartussanngorput.
Akiliisinnaajunnaarneq Nunamineralsimut annertunerusumik sunniuteqassanngilaq, kisianni aktianik tunisinerup kinguneranik aktiat ataatsimut nalingisa appariarnissaat ernumanarsinnaasoq, pisortaq Ole Christiansen oqarpoq.
Nunaminerals 230 millionit koruunit tikillugit naleqassangatinneqarpoq. Eqqoriaanerit malillugit Carsten Bergip aktiaatai 40 millionit koruunit missaannik naleqassangatinneqartut, sermitsiaq.ag-mi allaaserineqarpoq.
Nunamineralsimit aktianik taama naleqartigisunik siornatigut tunisisoqarnikuunngilaq, tuniniaanermi Nykredit akisussaasuussasoq sermitsiaq.ag-mi allaaserineqarpoq.