Assi: Ilisimatusarfik

Inuiaqatigiilerisoq: Aningaasaatikilliortut amerlanerulinnginnissaat sivisuumik patajaatsumillu sulissutigineqassaaq

Amerlanerusut aningaasaatikilliortunngussanngippata politikkikkut samminninnissaq allanngorartoqannginnissaalu amigaataapput minnerunngitsumillu isumaginninnikkut iliuuseqartoqartariaqarluni. Ilisimatusarfimmi inuiaqatigiilerisoq, Steven Arnfjord taama isumaqarpoq.

Nunatta Naatsorsueqqissaartarfiata nunatsinni aningaasaatikilliortut pillugit ukiumoortumik saqqummersittagaani 1792-it aningaasaatikilliortutut nalunaarsorneqarsimapput. Tamanna naatsorsueqqissaartarfiup naatsorsortagaani aatsaat taama qaffasitsigivoq.

Pigissaannginnerusut amerliartuinnassanngippata politikkikkut patajaassuseqartariaqarlunilu iliuuseqartoqartariaqarpoq:

- Inuiaqatigiinnut politikkimut atatillugu politikerit ataavartut Inatsisartuni Naalakkersuisuniluunniit atuuffimminiiginnartussat pingaartumik amigaataapput, Ilisimatusarfimmi inuiaqatigiilerisoq, Steven Arnfjord oqarpoq.

AAMMA ATUARUK 1800-ngajaat aningaasaatikilliortut

Aningaasaatikilliortuunermut 2017-imi killiliussaq akileraareernermi 77.000 koruunit missaannik ukiumut isertitaqarnermiippoq.

Steven Arnfjordip oqarnera naapertorlugu aningaasaatikilliortut ukiup tullissaanut amerlanerulissanngippata piffissamut sivisuumut patajaatsumillu suliniuteqartoqartariaqarpoq.

Taassuma isumaginninnermut naalakkersuisuusimasoq, Martha Lund Olsen politikerini susassaqarfimmi tassani ukiuni kingullerni sivisunerpaamik issiasimanerarpaa:

- Ineriartortitsinissamut suliniuteqartoqarpoq pikkorissaanernillu suliniuteqartoqarluni, susassaqarfinnili taamaattuni ukiuni marlunni, pingasuni amerlanerusuniluunniit atuuffigineqartussani inissisimasut nikeraqattaarneranni piffissamut ungasinnerusumut iliuusissaqarnissamut ajornartorsiutaasarput, piffissamilu sivisuumi atuuttussat pisariaqartinneqarput.

AAMMA ATUARUK Ineqarnermut akiliutinik akilinngitsuukkat ikilisinneqartut

Taamaammat politikerit susassaqarfimmik samminninngikkunik atugarliuuteqartut amerliartuinnassasut Arnfjordip nalilerpaa.

- Taamaammat tamanna takuarput. Politikkikkut samminninngikkaanni tamanna qaffakkiartoratarsinnaavoq, taamaattoqarpallu iliuuseqartoqangaatsiassalluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl