Aningaasaateqarfimmik pilersitsipput

Sulinermik Inuussutissarsiuteqartut Kattuffiat aamma KNI A/S ukiuni pingasuni, tassa 2009-mit 2012-imut atuuttussamik isumaqatigiissuteqaqqammerput.
Allattoq Elisa Isaksen
juulip 08-at 2009 07:52

Isumaqatigiissuteqarnikkut KNI-mi sulisut, ukiuni pingasuni agguataarsimasumik, akissarsiaat 10,1 procentimik qaffariassapput.

Tamatumunnga peqatigitillugu illuatungeriit aningaasaateqarfimmik pilersitsinissaq isumaqatigiissutigaat, ilungersunartumik napparsimasoqartillugu, illoqarfigisarlu qimallugu sivisunerusumik katsorsartittoqartariaqalersillugu aningaasaateqarfik qinnuteqarfigineqarsinnaassaaq. Sivisuumik katsorsartittoqartillugu sulisut najugaqarnerminnut aningaasartuutinullu allanut tunngatillugu ikiorserneqarnissaminnik qinnuteqarsinnaanissaat eqqarsaataavoq.

Taamaattorli illuatungeriinnit tusagassiorfinnut nalunaarummi ilisimatitsissutigineqarpoq, aningaasaateqarfik 2011-mi apriilip aallaqqaataata kingornagut aatsaat qinnuteqarfigineqarsinnaalissasoq. Tamatumani aningaasaateqarfiup aningaasatigut tunngavissaqarluarnissaa qulakkeerniarneqarmat.