Aningaasaateqarfik meeqqat tamarmik pinnagit
Naalakkersuisunik ukioq kingulleq uppititseqataasoq tallimanngormat inatsisartuni aappassaaneerneqarpoq, tassalu meeqqat tamarmik ileqqaarfigineqarnissaat.
Saqqummiunneqaqqaarnerminiilli siunnersuut allanngortinneqangaatsiarpoq. Aningaasat meeqqanut ataasiakkaanut allagartalersornagit ataatsimut aningaasaateqarfimmut inissinneqassapput, meeqqallu 18-iliigunik aningaasaateqarfimmut qinnuteqarsinnaapput. Ukiumut meeqqap ataatsip 1000 koruunit ileqqaartassagai pilersaarutigineqarpoq, naatsorsuutigineqarporlu ukiumut 18 millioner koruunit nunatta karsianit ukiumut illikartinneqartassasut.
- Aningaasat namminneq sulinissaat ajornannginneralaarsuarmik taamaalilluni isumagineqarpoq, Aningaasaqarnermut Naalakkersuisoq Josef Motzfeldt (IA) Qanoruumut oqarpoq.
Taassumaa aamma ilisimatitsissutigaa aningaaserivik sorleq atorniarneqarnersoq suli aalajangiunneqanngitsoq. - Aap aningaaseriviit marluk pensionskasse-llu marluk oqaloqatigineqarput, inatsimmillu tunngavissaqalerutta aatsaat toqqaasinnaalissaagut, Josef Motzfeldt oqarpoq.
