Ivalo & MinikAssi: Brian Mølgaard/KNR

Aningaasaateqarfik Ivalo & Minik ilinniagaqartunut legatinik agguaasoq

Kalaallit ilinniagaqartut arfineq-marluk nunatta avataani ilinniarnissaminnik takorluugaqartut katillugit millionip affaa sinnerlugit Aningaasaateqarfimmit Ivalo & Minimmit legatinnatsinneqarput.

Ilinniartitaanermut aningaasaateqarfiup siunertaraa kalaallit nunani tamalaani ingerlariaqqiffiusumik ilinniarnissaminnik imaluunniit nunani tamalaani ilinniaqqinnissaminnik aammalu suliffeqarfimmi suliniaqatigiiffimmiluunniit suliffimmik misiliinissaminnik kissaateqartunut legatinik agguaassisarnissaq.

- Neriuppunga legatiutigut aqqutaajumaartut ilinniartut piginnaaneqanerulernissaannut aamma misilittagaqarnerulernissaanut, taakkununnga Kalaallit Nunaannullu iluaqutaasumik, aningaasaateqarfiup siulersuisuini siulittaasoq Minik Rosing taama oqarpoq.

Legatinnattut arfineq-marluusut tusagassiornerup, ujarassiornerup, peqqissaanerup, nunani tamalaani niuernerup kiisalu oqaatsit atuakkialerinerlu pillugit ilinniagaqartuupput.

Taakku nunarsuarmi sumiiffinni assigiinngitsuni ilinniartussanngorput - Canadami, Norgep avannaani, Sverigemi, Frankrigimi, Australiami Tanzaniamilu.

 

Legatinnattut
Andrea Christiansen  legatinnappoq, Ilisimatusarfimmi tusagassiortunngorniarnerminut atatillugu semesteri ataaseq Canadami Vancouver Island Universitymi  ingerlanniassammagu.

Angùnguak Thomas Kleist Jepsen legatinnappoq Københavnip universitetiani ujarassiuumut ilinniarnerminut atatillugu Australiami Curtin Universitymi semestret pingasut ingerlanniassammagit.  

Birthe Rasmussen Ilisimatusarfimmi peqqissaasumut ilinniarpoq. Legatimik pissarsivoq Mellemfolkeligt Samvirke aqqutigalugu Tanzaniami peqqissaasutut ilinniarnerminut atatillugu sungiusaatigalugu suliniassammat.

Hans Peder Kirkegaard legatinnappoq Nunarsuarmioqatigiit niueqatigiinnerat pillugu Masterimut  USA-mi University of South Carolinami Darla Moore School of Businessimi atuarniassammat.

Mikaela Augustussen peqqissaasutut naammassinikuuvoq aallartinnikuullugulu Ph.D-mut ilinniarnini Ilisimatuarfimmi qulequtaqartoq "Kalaallit Nunaanni Danmarkimilu kalaallinut nappaassuarmik kræftimik napparsimangaatsialereersunut nipaallisaalluni katsorsaaneq". Tassunga atatillugu Tromsømi Norgep Arktiske Universitetiani atuarnissaminut legatimik pissarsivoq.  

Mona Koch Madsen Ilisimatusarfimmi peqqissaasumut ilinniarnikuuvoq. Sverige Stockholmimi Karolinska Institutimi intensivsygeplejerskimut ilinniaqqinnissaminut legatimik pissarsivoq.

Uiloq Mathæussen Ilisimartusarfimmi Oqaatsinut, Atuakkialerinermut aamma tusagassiutinut bacheloriuvoq. Ilinniaqqinnerminut atatillugu Frankrigimi Université De Versailles St. Quentin En Yvelinesimi semesteri ataaseq atuassavaa tassunga atatillugu legatimik pissarsivoq. 

Aningaasaateqarfik Ivalo & Minik NunaFondimit 2012-imi pilersinneqarpoq. Kunngissakkut marluliaataannut Josephinemut Vincetimullu kalaallisut Ivalomik Minimmillu aamma teqartunut atsiussaavoq.
NunaFondip saniatigut Nunatsinni inuussutissarsiutinik ingerlatallit aamma aningaasaliisuupput. Royal Arctic Line, Royal Greenland aamma Grønlandsbankip Inuussutissarsiornermut aningaasaateqarfia aningaasanik tunissuteqartuupput.
Kunngikkormiutut Ataqqinassusilik Prinsesse Josephine Sophia Ivalo Mathilda aamma Kunngikkormiutut Ataqqinassusilik Prins Vincent Frederik Minik Alexander, Kunngikkormiutut Ataqqinassusillip Kunngissap Frederiup nuliatalu Kunngikkormiutut Ataqqinassusillip Kronprinsesse Maryp qitornaat Aningaasaateqarfik Ivalo & Minimmut atsiunneqarsimapput.
 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl