Aningaasaateqarfik aningaasanik agguaasoq

Kunngikkormiut Kalaallit Nunaannut tunngassuteqartuni aningaasaateqarfiat pingaartumik meeqqanut inuusuttunullu iluaqutaasussanik aningaasanik agguaasseqqammerpoq, aningaasat 270.000 koruunit aningaasaateqarfiup siulersuisuinit agguaanneqarmata.
Allattoq Mads Lynge
marsip 29-at 2008 17:05

Paasisassarsiorniarluni Danmarkimut angalanissanut atugassat 50.000 koruunit tunniunneqarput. Ilulissani Pinaveersaartitsinermik allaffeqarfik meeqqat sumiginnagaasimasut aasaru aallaarsimaartinneqarnissaannut atugassaannik aningaasanik 30.000 koruuninik tunineqarput, Nuummilu meeqqat inuusuttullu ornittagaat Mælkebøtten 25.000 koruuninik tunineqarluni.

Atuakkiornissamut filmiliornissamullu aningaasat atugassat aamma agguaanneqarput.

Sermersuup aakkiartornera pillugu ilisimatuup Shfaqatat Abbas Khanip piviusulersaarutaa 25.000 koruuninik aningaasaliiffigineqarpoq, soorluttaaq atuakkanik naqiterisitsisarfik Jepsen & Co. 20.000 koruuninik tunineqartut.

Taakku Lars-Emil Johansenimut tunngasumik atuakkiassamut 20.000 koruuninik aningaasaliiffigineqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq